Сэбиэскэй Сойуус Дьоруойа Федор Попов төрөөбүтэ 100 сылынан ыытыллар үлэлэр

Ааптар: Эдэр Саас

Бөлөххө киир:

2021 сыл ахсынньы ыйыгар Саха сирэ Сэбиэскэй Сойуус Дьоруойа Федор Кузьмич Попов төрөөбүтэ 100 сылын бэлиэтиир.

Бу даатаҕа бэлэмнэнии иитинэн, баараҕай инфраструктурнай бырайыактары олоххо киллэриигэ, издательскай, култуурунай-сырдатар уонна патриотическай тэрээһиннэргэ өрөспүүбүлүкэҕэ улахан былааннаах үлэлэр ыытыллаллар.

Үбүлүөйгэ бэлэмнэниигэ уонна тэрийэн ыытыыга бигэргэтиллибит тэрээһиннэр былааннара толоруллууларын от ыйын 14 күнүгэр СӨ Ил Дархана Айсен Николаев көрдө. Кини былааҥҥа өрөспүүбүлүкэ, улуус уонна нэһилиэк таһымнаах сүүрбэттэн тахса тэрээһиннэр киллэриллибиттэрин, ол иһигэр инфраструктурнай бырайыактар баалларын бэлиэтээтэ. Былааны олоххо киллэриигэ эппиэттээхтэринэн аҕыс министиэристибэ, ону сэргэ Мэҥэ Хаҥалас улууһа, Дьокуускай куорат, Мэҥэ Хаҥалас улууһун Баатара нэһилиэгэ буолаллар.

2021 сыл Мэҥэ Хаҥалас улууһугар Сэбиэскэй Сойуус Дьоруойа Федор Попов төрөөбүтэ 100 сылынан Дьоруой сылынан биллэриллибитэ.

Улууска быйылгы уонна эһиилги сылга инфраструктурнай бырайыактары олоххо киллэрии былааннаммыта — 24 км усталаах «Майа-Төҥүлү-Бороҕон-Сыымах» айан суолун өрөмүөнэ, газификация уонна түргэн интэриниэт ситимигэр холбооһун. Эппиэттээх министиэристибэлэр салайааччылара иһитиннэрбиттэринэн, инфраструктурнай бырайыактары олоххо киллэрии түһүмэхтэринэн ыытыллар. «Майа-Төҥүлү-Бороҕон-Сыымах» айан суолун оҥоруу суол учаастактарын өрөмүөнүттэн саҕаланар. Сэлиэнньэ социальнай суолталаах эбийиэктэрэ түргэн тэтимнээх интэриниэт ситимигэр холбоммуттар. Нэһилиэнньэ сайаапкатынан кэтэх ыаллар холбоноллоро хаалбыт. СӨ Тыа хаһаайыстыбатын министиэристибэтин сүнньүнэн эһиил Баатара нэһилиэгэр Тиэрэ үрэххэ гидротехническэй тутуу үлэтэ түмүктэниэхтээх.

Маны сэргэ, үбүлүөй иитинэн өрөспүүбүлүкэҕэ барытыгар араас тэрээһиннэр ыытыллаллар. Дьокуускай куоракка Федор Попов уулуссатыгар Сэбиэскэй Сойуус Дьоруойун искибиэрин тутарга сир бэриллибитэ. Манна пааматынньык туруоруллуохтаах. Мэҥэ Хаҥалас улууһугар Дьоруой олорбут «Сайыҥҥы тиэргэнэ» — култуурунай нэһилиэстибэ эбийиэгэ саҥардыллара былааннанар.

Мунньах түмүгэр Айсен Николаев сахаттан бастакы Сэбиэскэй Сойуус Дьоруойа Федор Попов үбүлүөйдээх сыла уопсастыба интэриэһин улаханнык тардарын бэлиэтээтэ. Бары былааннаммыт суолталаах улахан тэрээһиннэр үрдүк таһымнаахтык ыытыллыахтаахтарын, өрөмүөнү уонна суол тутуутун, тыа хаһаайыстыбатын, күөх төлөнү, сибээһи кытары ситимнээх бырайыактар олоххо хаһан киллэриллэр болдьохторо чуо ыйыллан биир кэлимник быһаарыллыахтаахтара этилиннэ.

Андрей Сорокин (СИА) хаартыскаҕа түһэриитэ