Сэбиэскэй Сойуус Дьоруойа Алексей Миронов Венгрияҕа харалла сытар көмүс уҥуоҕар сибэкки дьөрбөтүн уурдулар
Эйэлээх, үрүҥ күн анныгар олорорбутугар саха хорсун саллааттара үтүөкэн өҥөлөөхтөр, бүгүҥҥү дьоллоох олох иһин сырдык тыыннарын толук уурбут тугунан да кэмнэммэт сүдү бэлэхтээхтэр. Кинилэр Албан ааттарыгар сүгүрүйэр, кинилэри үйэтитэр биһиги кэнчээри ыччат ытык иэстээхпит…
edersaas.ru, Татьяна Потапова
Сэбиэскэй Сойуус Дьоруойа Алексей Афанасьевич Миронов — биһиги, үөһээ бүлүүлэр, биир дойдулаахпыт буоларыттан муҥура суох киэн туттабыт. Биһигин ыйаабыт Кэнтик нэһилиэгин олохтоохторо чулуу уолбут олоҕун чинчийиитигэр, кинини үйэтитиигэ бэйэлэрин кылааттарын киллэрэллэрэ хайҕаллаах, махталлаах.
Кэнтик нэһилиэгин библиотекатын сэбиэдиссэйэ Мария Захаровна Ущницкая, быйыл Улуу Кыайыы үбүлүөйдээх 75 сылын көрсө, Венгрияҕа харалла сытар Алексей Миронов көмүс уҥуоҕар сибэкки дьөрбөтүн уурар туһунан Венгрияҕа олорор Саха сириттэн төрүттээх Анна Протопоповаҕа Кэнтик дьонун аатыттан көрдөһүү сурук суруйбута. Мария Захаровна кинини Саха сирин Тас дойдуну кытта сыһыаннаһыыларын министиэристибэтин нөҥүө булбута. Венгрия Будапешт куоратыгар олорор Анна Протопопова тутатына сөбүлэҥин биэрэн үөрдүбүтэ. Ол эрэн сыстыганнаах коронавирус ыарыыттан хааччахтааһын миэрэлэр баар буоланнар, Анна бэйэтэ барар кыаҕа суох буолан, Алексей Миронов көмүллэ сытар кылабыыһатыттан чугас олорор эмиэ Саха Сириттэн төрүттээх Чуприна Галина Лаврентьевнаттан көрдөспүтэ. Галина Лаврентьевна көрдөһүүнү ылынан, ыам ыйын 9 күнүгэр, Улуу Кыайыы 75 сылын бэлиэтиир үөрүүлээх күнүгэр, кэргэнин кытары сержант Алексей Афанасьевич Миронов көмүллэ сытар уҥуоҕар сибэкки дьөрбөтүн ууран, бүтүн Саха сирин аатыттан махталбытын, сүгүрүйүүбүтүн тиэртилэр.
Маҥнай утаа, саха чулуу буойунун уҥуоҕар сибэкки дьөрбөтүн кытары ийэ буорун илдьэр туһунан санаа үөскээбитэ да, хомойуох иһин, сыстыганнаах коронавирус ыарыы бүтүн дойду үрдүнэн сатараан, ийэ буорун илдьэр кыаллыбата.
Ол да буоллар, кэнчээри ыччат туһугар сырдык тыынын кэрэйбэтэх Саха чулуу уолугар, Сэбиэскэй Сойуус Дьоруойугар Алексей Афанасьевич Мироновка сүгүрүйүү сиэрэ-туома ыытыллыбыта олус долгутуулаах.
Мария Ущницкаяҕа, Анна Протопоповаҕа, Галина Чупринаҕа бу үтүө санааҕыт, хайҕаллаах дьыалаҕыт иһин Алексей Афанасьевич биир дойдулаахтарын аатыттан улахан махтал!
Татьяна Потапова, Үөһээ Бүлүү улууһа
edersaas.ru