Бэлиитикэ

Сэбээн Күөллэр хотугу нэһилиэнньэлээх пуун аатын туруорсаллар

Кэбээйи улууһун Сэбээн Күөл олохтоохторо Арассыыйа Арктикатын зонатыгар киирэри туруорсаллар. Бу туһунан кинилэр бүгүн бырабыыталыстыба отчуотун кэмигэр иһитиннэрдилэр. Мунньах быһа сибээһинэн буолла. Сүрүн дакылааты СӨ баайга-дуолга, сир сыһыаннаһыытыгар миниистирэ Павел Иванов оҥордо.

Сэбээн Күөлү арктическай нэһилиэнньэлээх пууннарга киллэрии туһунан боппуруоһу нэһилиэнньэ туруорсубута ыраатта. СӨ Арктикатын уонна хотугу норуоттар дьыалаларыгар миниистири солбуйааччы Михаил Погодаев бэлиэтииринэн, Саха сириттэн Арассыыйа арктикатын зонатыгар 13 улуус киирэн турар. Хотугу муустаах муора аттыгар сытар улуустары таһынан манна кэлин өссө аҕыс хотугу улуустар киирбиттэрэ. Билигин нэһилиэнньэлээх пууну туспа Арктика зонатыгар киллэрэр быраабыла суох. Арктика зонатыгар киирэргэ чопчу ирдэбиллэр, нуормалар бааллар. Биир сүрүн ирдэбилинэн муораттан чугас сытар нэһилиэнньэлээх пууннар буолуохтаахтар.

Санатан эттэххэ, Сэбээн Күөл Сангаартан 190-ча биэрэстэ ыраах сытар. Суола-ииһэ суох, ыраах сытар нэһилиэнньэлээх пууннарга киирсэр. Манна саха, нуучча тылын таһынан төрөөбүт тылларын эбээн тылын үөрэтэллэр. Өрөспүүбүлүкэҕэ үс тылынан кэпсэтэр биир тарбахха баттанар национальнай бөһүөлэк буолар.

Аграфена КУЗЬМИНА, «Саха сирэ», edersaas.ru

0
0
Telegram @edersaas20