Кэбээйи улууһун Сэбээн Күөлүн олохтоохторо дойдуларыгар дьэ, көттүлэр. Ол эрээри, кэһиилэрин, малларын-салларын пуорка хааллардылар.
Кэбээйи улууһун Сэбээн Күөлүн олохтоохторо бэҕэһээ, тохсунньу 1 күнүгэр, бөртөлүөтүнэн дойдуларыгар көттүлэр. Саҥа дьыл күн кинилэр дойдуларыгар сатаан көппөккө эрэллэрэ сүппүтэ. Ол эрээри, сарсыҥҥы күн соһуччу сарсыада аҕыс чааска гостиницаларыгар оптуобус кэлэн барыларын ылбыта. Үөрүүлээх күннэрин арай дьонноругар ылбыт кэһиилэрэ пуорка хаалбыта буортулаата. Бу дьон бары кэриэтэ Дьокуускайтан дьонноругар, оҕолоругар кэһии, ас-үөл ылан баран сатаан илдьэ барбатахтар.
Бу туһунан нэһилиэк баһылыга Алена Кривошапкина иһитиннэрбит:
— Биһигини олус түргэнник бөртөлүөккэ олордубуттара. Бөртөлүөт иһэ толору буолан биһиги кыһалҕаттан малбытын, аспытын-үөлбүтүн хаалларбыппыт. Биллэн турар, аспыт-үөлбүт барыта түргэнник буорту буолар аһылыктар: оҕуруот аһа, фрукта, сымыыт о.д.а.
Сэбээн Күөлгэ диэри рейс суох буолан биһиги бырааһынньыктааҕы остуолга дьоммутугар астаах, кэһиилээх тиийэр санаалаахпыт. Хас биирдии киһи 50 киилэ малы илдьэрдии былааннаммыта, сорохтор оннооҕор эрдэ төлөбүрүн уйуммуттар этэ. Биһигиттэн олох аҕыйах киһи дьонугар кэһиилээх тиийдэ. Биир кыыс үс ячейка сымыыты илиитигэр тутан илтэ. Мин тус бэйэм социальнай бэлэхтэри, атыылаһыллыбыт эми-тому барытын хааллардым. Бөртөлүөккэ баппат, ботолуогар диэри толору чахчы мал этэ. Сөхтөрбүтэ диэн бөртөлүөккэ олорсооччуларга буолбакка, мал-сал ыытааччыларга болҕомто уураннар, биһиги айаннааччылар малбыт барыта хаалла. Хаалбыт малбыт тохсунньу 10 күнүгэр биирдэ кэлэр үһү. Онуоха диэри аспыт барыта буорту буолар…
Бу иннинэ нэһилиэккэ «Якутопторг» биир туонна сибиэһэй оҕуруот аһын, фруктаны , сымыыты, майонеһы, араас минньигэс аһы аҕалбыт эбит да, үгүс дьон тиксибэтэх. «Бу балаһыанньаҕа кыһыҥҥы суол сабыллан турара сүрүн оруолу оонньоото, уоннааҕыта аспыт-үөлбүт массыынанан кэлиэхтээҕэ хаалла», — диэн иһитиннэрэр баһылык.
Ульяна ЗАХАРОВА.