![](https://edersaas.ru/wp-content/uploads/2019/04/Mariya-2-2-e1554425123115.jpeg)
Култуура уонна искусство кэллиэһин устудьуоннарын «Күн өркөн» алтыс отчуоттуур кэнсиэрэ муус устар 3 күнүгэр А.С. Пушкин аатынан нуучча академическай тыйаатырыгар ситиһиилээхтик барда.
Үтүө үгэс быһыытынан, бу сыллааҕы сүрүн кэнсиэртэригэр кэллиэстэр бастыҥ выпускниктарын уонна үөрэҕи бүтэрээччилэрин чиэстииллэр. Кыайыылаахтарга “Күн Өркөн” бэлиэ туттарыллар.
Ол курдук, быйыл «Идэҕэ бэриниилээх буолуу иһин» номинация лауреатынан үөрэх кыһатын 1968 сыллааҕы выпускнига, күн бүгүнүгэр диэри Чурапчы улууһунааҕы култуура управлениетыгар айымньылаахтык үлэлии сылдьар исписэлиис, ССРС култууратын туйгуна, РСФСР култууратын үтүөлээх үлэһитэ Мария Андреевна Герасимова-Сэҥээрэ буолла.
— Өрдөөҕүтэ бүтэрбит киһини ыҥыран, соһуттулар. Үөрдүм, долгуйдум. Култуура үлэһиттэрэ, дьэ, чахчы да халыҥ аармыйа эбиппитин өссө төгүл көрөн итэҕэйдим. Кэскиллэрбит, ыччаттарбыт талааннара сүрдээх чаҕылхай. Көрө олорон киһи үөрэр.Инникилээх эбиппит! — диир лауреат Мария Андреевна.
Норуот фольклоругар бөдөҥ исписэлиис, чабырҕаҕы, олоҥхону, оһуохайы тарҕатааччы, толорооччу, уһуйааччы, норуодунай тыйаатыр артыыһа, режиссер, сценарист… бу барыта – Мария Герасимова!
“Күн Өркөн” – бу кини биирдэ талан ылбыт идэтигэр бэриниилээх буолуутун, улахан талаанын, ыччаттарга үтүө холобур буолар дьүккүөрдээх үлэтин билинии буолар.
“Ытыктабыллаах Мария Андреевна, култуура эйгэтигэр өссө да туруулаhан үлэлээ-хамсаа, айа-тута, үөрдэ сырыт”, — дэһэллэр биир идэлээхтэрэ.
ЫСПЫРААПКА
Герасимова Мария Андреевна – Сэҥээрэ
Өрөспүүбүлүкэтээҕи култуура училищетын (Култуура уонна искусство кэллиэһин) 1968 сыллааҕы выпускнига,
Билиҥҥи кэм биллиилээх чабырҕахсыта,
Чабырҕаҕы тарҕатааччы, айааччы, үйэтитээччи,
Чабырҕахха 3 хомуурунньук ааптара,
Чабырҕаҕы Арассыыйа улахан куораттарыгар, Москваҕа Кириэмилгэ Сийиэстэр дыбарыастарыгар, П.Чайковскай аатынан уонна Колоннай саалаларга иһитиннэрбит бастыҥ толорооччу.
Чабырҕахха ыытыллар өрөспүүбүлүкэтээҕи куонкурус ааптара, тэрийээччитэ.
ССРС култууратын туйгуна,
РСФСР култууратын үтүөлээх үлэһитэ,
Чурапчы улууһун Бочуоттаах олохтооҕо.
Татьяна Маркова.
Сүрүн хаартыскаҕа: Култуура уонна искусство кэллиэһин дириэктэрэ Захар Никитин уонна «Күн Өркөн» бириэмийэ лауреата Мария Герасимова-Сэҥээрэ кыыһынаан Күннэйдиин.