Маны аах Уопсастыба

«Сделано в Якутии» тэрилтэ олохтоох оҥорон таһаарааччылары түмүөҕэ

Өрөспүүбүлүкэ салалтата билиҥҥи экэниэмикэҕэ урбаанньыттарга Саха сиригэр оҥорон таһаарар эйгэни тэтимнээхтик сайыннарар соругу туруорар. Ырыынак хамсааһыныгар сөпкө туттан-хаптан хаалар, бэйэ туһунан биллэрэр — билиҥҥи кэм ирдэбилэ.

Судаарыстыбаннас күнүгэр, балаҕан ыйын 27 күнүгэр, Дьокуускайга Өксөкүлээх Өлөксөй аатынан Норуоттар Доҕордоһууларын киинигэр өрөспүүбүлүкэ 100 сылыгар анаан «Сделано в Якутии» уопсастыбаннай тэрилтэ сүрэхтэниэҕэ.

Бу күн сарсыардаттан олохтоох оҥорон таһаарар тэрилтэлэр, урбаанньыттар, биирдиилээн дьарыктанар дьон Саха сирин баайын, утумун, киэн туттуутун кэрэһилиир оҥоһуктары, сонун бородууксуйаны көрдөрөр киэҥ далааһыннаах дьаарбаҥкаларын тэнитиэхтэрэ. Күн устата дьаарбаҥкаҕа араас маастар-кылаастар, сахалыы остуол оонньууларын билиһиннэрии, күрэстэр буолуохтара. Саҥа сонун кинигэ ааптардарын кытта көрсүһүү, автограф-сессия тэриллиэ.

Киэһэ 18.00 чааска Өксөкүлээх киинин сыанатыгар «Сделано в Якутии» холбоһук үөрүүлээх быһыыга-майгыга сүрэхтэниэҕэ, маҥнайгы чилиэттэригэр туоһу суруктары туттарыахтара. Онтон киэһэ саха мааны таҥаһын түһүлгэтигэр «Иис-уус» диэн ааттаах дефилеҕэ иис тэрилтэлэрэ, биирдиилээн маастардар, өрөспүүбүлүкэ тыйаатырдарын худуоһунньуктара кыттыахтара. Биллиилээх худуоһунньук, модельер Августина Филиппова аатырбыт моделларын көрдөрүөҕэ.

Тэрээһин «Көмүлүөк» саха иһитин хампаанньатын салайааччыта, «Сделано в Якутии» холбоһук бэрэссэдээтэлэ Ольга Григорьева көҕүлээһининэн, урбаан, атыы-эргиэн уонна туризм министиэристибэтин, Саха Өрөспүүбүлүкэтин Уопсастыбаннай палаататын өйөбүлүнэн тэриллэр.

0
0
Telegram Whatsapp