«SCIBERIA» оҥорбут бырагыраамата коронавируһу 1 мүнүүтэ иһигэр быһаарыан сөп

Муус устар бүтүүтэ Дьокуускайга IT- пааркатын резиденэ, «SCIBERIA»хампаанньа айбыт бырагыраамата үлэҕэ киирбитэ. Бу бырагыраама сүр кылгас кэм иһигэр «искусственнай интеллект» көмөтүнэн компьютернай томографияҕа коронавирустан үөскүүр пневмонияны быһаарар. Томографияны чинчийии уонна түмүгү таһаарыы үлэҕэ туттуллар матырыйаал ахсааныттан көрөн, 20 сөкүүндэттэн 1 мүнүүтэҕэ диэри эрэ кэми ылар. COVID-19 ыарыыны эндэтэр үлэни тохтоло суох ыытарга көмөлөһөр «SCIBERIA» хампаанньа бырайыага эрдэтээҥҥи түмүктэрэ бэлэмнэр диэн Инновация министиэристибэтин пресс-сулууспата иһитиннэрэр.

edersaas.ru

Муус устар 27 күнүттэн Дьокуускай куорат 3 №- дээх балыыһатын компьютернай томографиянан чинчийиилэригэр бу систиэмэни туруоруу, тургутуу үлэлэрэ саҕаламмыттара.

Муус устар бүтүүтэ Дьокуускай куорат 3 №- дээх балыыһатыгар 43 коронавируһу кытта сибээһэ суох интерстициальнай пневмониялаах, 43 доруобай дьон тыҥатын,  коронавирус ыарыыта бигэргэммит 27 киһини бу систиэмэнэн чинчийэн көрбүттэр.

Бу систиэмэни айбыт үлэһиттэр этэллэринэн, бырагыраама COVID-19 ыарыынан сыстыы түгэнин 95% сөпкө булар. Ыарыы суоҕун 97% чопчулаах быһаарар.

“Ыам ыйын 7 уонна 15 күннэрин иһигэр 8-тан 89 саастарыгар диэри саастаах  ыарыыга уорбаламмыт 81 киһини  бу скрининг нөҥүө чинчийдибит. Олортон 61 киһи коронавируска “положительнай” анаалыстаах буолуохтарын сөп диэн быһаарда. Биһиги бырагыраамабыт быраас үлэтин чэпчэтэргэ аналлаах, систиэмэ биэрбит чахчылара сөптөөх диагноз туоруорга көмөлөһөллөр” — диир хампаанньа генеральнай дириэктэрэ Игорь Саввин.

Билигин бу методиканы сайыннарар сыалтан «SCIBERIA»хампаанньа уонна Дьокуускай куорат 3 №- дээх балыыһата сөбүлэһии түһэристилэр. Чинчийии кэмигэр ылыллыбыт

дааннайдар нейроннай ситими үөрэтиэхтээхтэр, уонна кэнники коронавируһу быһаарарга аналлаах сертификаттаммыт ПО оҥорууга көмө буолуохтаах.