Кулун тутар 16-17 күннэригэр Дьокуускайга көҥүл тустууга аан дойду Кубога ыытыллар. Кубокка, аан дойду былырыыҥҥы чөмпүйэнээтин түмүгүнэн аҕыс бастыҥ көрдөрүүлээх хамаанда күрэс былдьаһыаҕа.
Арассыыйа хамаандатын бөлөҕөр Куба, Япония уонна Турция хамаандалара киирдилэр. Иккис бөлөххө АХШ, Иран, Грузия уонна Монголия хамаандалара бааллар. Бу улахан эппиэтинэстээх күрэхтэһиигэ бэлэмнэнэн, Арассыыйа хамаандата икки түһүмэхтээх эрчиллэр-үөрэтэр түмсүүнү тэрийдэ. Түмсүү бүтүүтэ хамаанданы талар сүүмэрдиир хапсыһыылар түмүктэринэн, кылаабынай тириэньэр Дзамболат Тедеев Кубокка кыттар састаабы быһаарда.
Арассыыйа хамаандатын састааба:
57 кг: Арыйан Тютрин (Саха сирэ), Муслим Садулаев (Чечня).
61 кг: Зелимхан Абакаров (Москва-Чечня), Рамазан Ферзалиев (Дагестан).
65 кг: Гаджимурад Рашидов (Дагестан), Виктор Рассадин (Саха сирэ).
70 кг: Давид Баев (Хотугу Осетия), Анзор Закуев (Кабардино-Балкария).
74 кг: Заурбек Сидаков (Хотугу Осетия), Тимур Бижоев (Кабардино-Балкария).
79 кг: Магомед Рамазанов (Москва), Хусейн Суюнчев (Карачаево-Черкесия).
86 кг: Даурен Куруглиев (Дагестан), Владислав Валиев (Хотугу Осетия).
92 кг: Магомед Курбанов, Алихан Жабраилов (иккиэн – Дагестантан).
97 кг: Абдулрашид Садулаев (Дагестан), Владислав Байцаев (Хотугу Осетия).
125 кг: Зелимхан Хизриев (СПб-Чечня), Павел Кривцов (Кемерово).
Көрөргүт курдук, састаап – күүстээх. Хамаанда саамай үрдүк ааттаах-суоллаах кыттааччытынан – олимпийскай чөмпүйүөн, аан дойду үс төгүллээх чөмпүйүөнэ дагестанец Абдулрашид Садулаев буолар. Кини элбэх ахсааннаах ситиһиитигэр арай, аан дойду Кубогар кыайыыта тиийбэт. Киһи соһуйуох, Садулаев бу иннинэ биирдэ даҕаны аан дойду Кубогар кытта илик. Кинини тэҥэ хамаандаҕа аан дойду чөмпүйүөнэ Заурбек Сидаков, Европа чөмпүйүөннэрэ Гаджимурад Рашидов, Владислав Байцаев, Даурен Куруглиев бааллар.
Саха сириттэн састаапка Арыйан Тютрин уонна Виктор Рассадин киирдилэр. Билэргит курдук, кинилэр оҕо эрдэхтэриттэн СӨ үтүөлээх тренерэ Иван Иванович Дмитриев салалтатынан дьарыктаналлар (хаартыскаҕа).
Уолаттарбыт утарсааччылара кимнээҕий?
Кылгастык бэйэбит бөҕөстөрбүт утарсааччыларын сырдаттахха, Арыйан Тютрин тустар ыйааһыныгар Кубаттан – Америка континенын чөмпүйүөнэ, аан дойду былырыыҥҥы чөмпүйэнээтигэр бэһис миэстэлээх Рейнери Ортега, Японияттан – аан дойду иллэрээ сыллааҕы чөмпүйүөнэ, былырыыҥҥы боруонса призера Юки Такахаши уонна Турцияттан тустуу кулууптарын аан дойдутааҕы күрэхтэһиитин иккис призера Али Карабога бааллар. Көстөрүн курдук, утарсааччыларбыт бу ыйааһыҥҥа солбук тустууктара суохтар. Онон бөлөххө үс киирсии буолар эбит буоллаҕына, Тютриннаах Садулаевтан хайалара кими кытта киирсэрин кылаабынай тириэньэр бэйэтэ эрэ быһаарар.
Оттон уопсайынан ылан көрдөххө, 57 киилэҕэ өссө Грузия чөмпүйүөнэ Лаша Ломтадзе, аан дойду чөмпүйэнээтин боруонса призера Туменбилег Тувшинтулга (Монголия), иранец Алиреза Сарлак уонна американецтар Зак Сандерс, Зейн Ричардс бааллар. Тус санаабар, бу ыйааһыҥҥа Арыйан Тютриҥҥа ордук кутталлаах утарсааччыларынан аан дойду таһымыгар улаханнык тустубут Такахаши, Ортега уонна Тувшинтулга буолуохтарын сөп.
Оттон Виктор Рассадин тустар 65 кг ыйааһыныгар Кубаттан аан дойду икки төгүллээх боруонса призера Алехандро Вальдес, Японияттан Азия оонньууларын үрүҥ көмүс призера Дайчи Такатани, Турцияттан Европа үс төгүллээх призера Чингисхан Эрдоган (тувинец Опан Сат) бааллар, бары даҕаны киһи сэнээбэт тустууктара. Дьэ, хайдах буолар? Ханныгын да иһин, хатыһыылаах хапсыһыылары көрүөхпүт. Бу ыйааһыҥҥа иккис бөлөххө грузин Амиран Вахтангишвили, иранец Мортеза Гияси, монгол Батчулуун Батмагнай, американец Зейн Резерфорд бааллар.
Петр Павлов, «Дьулурҕан» эрэдээктэрэ.