Арассыыйа уонна Украина сыһыаннарыттан сылтаан, Арҕаа дойдулар уонна Эмиэрикэ холбоһуктаах штаттара дойдубутугар араас хабааннаах экэнэмиичэскэй санкциялары киллэрдилэр. Олортон биирдэстэринэн — аан дойдутааҕы каарта систиэмэтигэр кэккэ хааччахтары киллэрии буолла. Холобур, аан дойдутааҕы төлөбүр систиэмэтин үлэтигэр Арассыыйаҕа хааччахтары киллэрэр туһунан быһаарыныыны ылыммыттара. Ол эрээри, Сбербаан Visa уонна MasterCard каарталара Арассыыйа иһигэр төһө баҕарар үлэлиэхтэрэ, ханнык даҕаны хааччах тохтотуо суоҕа. Сотору кэминэн Сбербаан «Мир» UnionPay диэн хас даҕаны бреннээх (кобрендинговай) саҥа каартаны оҥоруоҕа. Бу каарта туспа систиэмэҕэ олоҕуран, омук дойдуларыгар барыларыгар хааччаҕа суох үлэлиир кыахтаах буолар.
Сбербаан Саха сиринээҕи пресс-сулууспатын исписэлииһэ Жанна Аянитова: “Сбербаан бары каарталара ханнык да харгыһа суох үлэлиэхтэрэ, интэриниэт, оффлайн маҕаһыыннарга барытыгар туһаныллыахтара. Тоҕо диэтэххэ, омук дойдуларыттан тутулуга суох анал төлөбүр систиэмэтинэн үлэлииллэр. Visa уонна MasterCard каарталарынан тас дойдуларга уонна тас дойдулардааҕы интэриниэт–маҕаһыыннарыгар туһаныыга хааччахтааһын баар. Ол иһин тас дойдуларга баар биир дойдулаахтарбыт, төһө кыалларынан, уу харчынан устаргытыгар сүбэлиибит. Билиҥҥи туругунан, “Мир” каарта систиэмэтэ Турцияҕа, Вьетнамҥа, Арменияҕа, Белоруссияҕа, Узбекистаҥҥа, Кыргызстаҥҥа, Таджикистаҥҥа, Казахстаҥҥа уонна Кипргэ үлэлииллэр. Оттон «Мир» UnionPay каарта сотору тахсыаҕа, таҕыста да ол туһунан иһитиннэриэхпит ”, — диэн быһаарда.