Сылы эргиччи үлэлиир «Саюри» тэпилииссэ комплекса тэпилииссэлэри тутуу инновационнай бырайыактарыгар бастыҥынан ааттанна.
Маннык быһаарыыны «Защищенный грунт России» анал быыстапка иитинэн ыытыллыбыт «Арассыыйа тэпилииссэлэрэ» Ассоциация тэрийбит куонкуруһун дьүүллүүр сүбэтэ оҥордо. Бу туһунан үөрүүлээх сонуну Уһук Илини уонна Арктиканы сайыннарыы Пуондатын пресс-сулууспата иһитиннэрэр.
«Арассыыйа тэпилииссэлэрэ» Ассоциация генеральнай дириэктэрэ Наталия Рогова бэлиэтээбитинэн, бу тэпилииссэ комплекса тымныы, ирбэт тоҥноох Уһук Хотугу сиргэ инновационнай технологиянан тутуллубута, уһулуччу ураты бырайыагынан буолар. «Аҕыйах сыллааҕыга диэри маннык эрэгийиэннэргэ тэпилииссэ комплекстарын тутар көдьүүһэ суох диэн буолара. Ол эрээри, аныгы технологиялар көмөлөрүнэн, Уһук Илин тэпилииссэлэри тутуу көдьүүстээҕэ, туһалааҕа көһүннэ. Бу олус үчүгэй. Тоҕо диэтэххэ, маннык бырайыактар баар буоланнар, Уһук Илин олохтоохторо сибиэһэй оҕуруот аһынан сылы эргиччи хааччыллаллар. Бэйэбит дойдубут бородууксуйата тастан аҕалыыны хаачыстыбатынан аһарар, оҕуруот кирээдэтиттэн атыыга тута тахса турар», — диэтэ кини.
«Саюри» бэрэстэбиитэлэ Валерий Гарипов тэпилииссэни тутарга ураты быһаарыылар ылыллыбыттара, ураты усулуобуйалаах сиргэ-уокка тэпилииссэ сылы эргиччи үлэлиирин хааччыйары таһынан, өссө бастыҥнар кэккэлэригэр таһааран үрдүк үүнүүнү хомуйар кыаҕы биэрбитин тоһоҕолоото.
2020 сылга «Саюри» тэпилииссэ комплексыттан 735 туонна оҕурсу, тамаат уонна күөх үүнээйи ылыллара былааннанар. Бу ааспыт 2019 сыллааҕар 3,5 төгүлүнэн элбэх. Бородууксуйа оҕо уһуйааннарыгар, маҕаһыыннарга тиэрдиллэр.
+1
+1
+1
+1
+1
+1
+1