Дьоппуон технологиятынан кыһыннары үлэлиир тэпилииссэ иккис уочарата аһылынна
Бэҕэһээ ыам ыйын 14 күнүгэр Тулагыга Сыырдаах нэһилиэгэр “Саюри” төгүрүк сыл үлэлиир тэпилииссэ иккис уочаратын арыйыыга HokkaidoCorporation дьоппуон хампаанньатын делегацията кэлэн кытынна. 2016 сыллаахха «Алмаасэргиэнбаан» дьоппуоннары кытта бу бырайыагы саҕалаан, ирбэт тоҥ үрдүгэр кыһыннары оҕуруот аһын үүннэрии аан дойдуга бастакы уопут үтүө түмүктэри көрдөрөн эрэриттэн ыраахтан кэлбит ыалдьыттар астыналларын биллэрдилэр. Онон Арассыыйаны, чуолаан Саха сирин кытта инникитин атын бырайыактарга эмиэ ылсарга бэлэмнэрин эттилэр.
Япония экэниэмикэҕэ уонна бырамыысыланнаска министиэристибэтин, Хоккайдо экэниэмикэҕэ уонна бырамыысыланнаска бюротун салайааччыта тойон Цуеси Макино кыттыгас бырайыактары өйүүргэ бэлэмин бэлиэтээтэ. Энергетиканы, аныгы агротехнологияны, бөҕү переработкалыыр собуоту тутууга, куорат эйгэтин тупсарыыга инникитин дьоппуоннары кытта бииргэ үлэлэһиэхпит.
СӨ Бырабыыталыстыбатын бэрэссэдээтэлэ Владимир Солодов билигин “Саюри” тэпилииссэ үһүс уочаратын тутуутун үбүлүүргэ дьоппуоннары кытта кэпсэтии бара турарын билиһиннэрдэ.
«Кэлэр ыйтан Дьокуускай куорат хас биирдии олохтооҕо манна үүннэриллибит экологическай өттүнэн ыраас, сибиэһэй оҕурсуну, салаат сэбирдэҕин амсайар кыахтаныаҕа, оттон аны күһүн помидор атыыга тахсыа. Кыһыннары төгүрүк сыл үлэлиир тэпилииссэ дьоппуон аныгы технологиятын, инженернай быһаарыытын көмөтүнэн олоххо киирдэ. Тэпилииссэ үһүс уочарата тутулуннаҕына, сылга 2000 туонна кэриҥэ сибиэһэй оҕурсу уһуйааннарга, оскуолаларга, куорат маҕаһыыннарыгар киириэ. Ону таһынан, инникитин манна сүүһүнэн саҥа үлэ миэстэтэ тэриллиэ», — диэтэ кини.
Тэпилииссэни салгыы тутуу үһүс түһүмэҕэ быйыл саҕаланыа. Бу бырайыагы олоххо киллэрэргэ Уһук Илини сайыннарыы пуондата эмиэ кыттыгас үп-харчы уган көмөлөһөр.
«Уһук Илин уонна Арктика эрэгийиэннэригэр аныгы тэпилииссэ тиһилигин тутарга Саха сирин холобуругар олоххо аан бастаан киирбит саҥа технологияны киэҥник тарҕатар санаалаахпыт», — диэн эттэ Уһук Илини сайыннарыы пуондатын генеральнай дириэктэрэ Алексей Чекунков.
Дьокуускай куорат баһылыга Сардаана Авксентьева “Саюри” тэпилииссэ тутуутугар куорат биир да харчы укпатаҕын, урут манна Тулагы сопхуоһа оҕуруот аһын үүннэрэр сиригэр аныгы дьоппуон технологиятынан инвестордар үптэринэн кыһыннары үлэлиир тэпилииссэ тутуллубута олохтоох дьоҥҥо дьоһун бэлэх буоларын чуолкайдаата.
Марианна Тыртыкова, «Саха сирэ», edersaas.ru