Арассыыйа уонна Украина сыһыаннаһыыларыгар биир дойдулаахтарбыт санааларын этэллэр уонна бары бииргэ буолуоҕуҥ дииллэр.
Савва Михайлов, СӨ Нэһилиэнньэ дьарыктаах буолуутугар судаарыстыбаннай кэмитиэтин бэрэссэдээтэлин солбуйааччы, РФКП Дьокуускайдааҕы салаатын салайааччыта:
— РФ Бэрэсидьиэнэ Владимир Путин Луганскай уонна Донецкай норуодунай өрөспүүбүлүкэлэри билиммитин сөптөөҕүнэн ааҕабын. Крымҥа уонна Донбасска бэйэбит дьоммут-сэргэбит олорор.
Бу сыллар тухары Киев дьону дьон диэбэккэ, аҥаар кырыы айбардаан олордо. Олохтоохтору барыларын сепаратистаргыт, террористаргыт диэн ыгаллар. Арассыыйаны кытта бииргэ буолуохха диир дьону өстөөх оҥордулар. Днепропетровск, Николаев, Харьков, Одесса куораттарга Улуу Кыайыы күнүн уруйдаан тахсар дьону кырбаабыттара, анаан-минээн бултаспыттара.
Бүгүҥҥэ диэри Украина сэбилэниилээх күүстэрэ, карательнай этэрээттэрэ, фашистара Донецк уонна Луганск олохтоохторун аракыаталарынан ытыалыы олороллор.
Бу маннык кэмҥэ, омугунан, итэҕэлинэн, баартыйатынан тутулуга суох, бука бары сомоҕолоһорбут ирдэнэр. Норуоппут туһугар аналлаах байыаннай эпэрээссийэ кэмигэр, дойдубутун сэмэлиири, араастаан холуннарыыны олох сыыһанан ааҕабын. Араас сымыйа сураҕы-садьыгы тарҕатыы адьас сыыһа. Баартыйабыт салайааччыта Виктор Губарев Донбасска элбэхтик сырытта, оҕолорго, кырдьаҕастарга көмөлөстө.
Аны туран, сэриини утарсааччылар тустарынан. Тоҕо бу дьон НАТО Сербияҕа түспүтүн сөптөөҕүнэн ааҕалларый? Эмиэрикэ Иракка, Дьобуруопа дойдулара Ливияҕа саба түспүттэригэр, дойдулары эспиттэригэр, мөлүйүөнүнэн дьону эчэтэн алдьархайы оҥорбуттарыгар, ханна сылдьыбыттарай? Биһиги дойдубут 2008 сыллаахха Соҕуруу Осетияны көмүскэспитэ. Билигин эмиэ оннук балаһыанньа. Бүгүн бэйэбитин көмүскэммэтэхпитинэ, сарсын биһигини ыһа кэлиэхтэрэ. Мин санаабар, сотору байыаннай эпэрээссийэ бүтүө, этэҥҥэ буолуо. Биһиги Сойуус саҕаттан элбэх санкцияны, сымыйаны ааспыт омукпут, билигин да бу ыарахаттары барытын тулуйуохпут. Саамай сүрүнэ, бииргэ буолуоххайыҥ!