Сааскы кустааһын саҕаланан, бултууру сөбүлүүр эр дьон билигин астына-дуоһуйа дурдаҕа сыттаҕа. Оттон Дьокуускай куорат биир олохтооҕо ол үчүгэйтэн бэйэтин буруйунан матан олорор.
Ол курдук, киин куорат полициятын дьуһуурунай чааһыгар биир маҕаһыынтан ыҥырыы киирбит. Уоруу тахсыбытын туһунан.
Оперативниктар бу уорууну «сылааһына» арыйбыттар — Чурапчыттан төрүттээх 38 саастаах уорбаланааччыны ыраатыннарбакка туппуттар.
Барыллаан быһаарыынан, бу киһи маҕаһыын долбууруттан 12.500 солк. сыаналаах көтөр саҥатын үтүктэр тэрили сойбоппут. Уорбаланааччы билиммитинэн, атыылаары буолбакка, бэйэтэ кустууругар туттаары уорбут.
Бу чахчынан «уоруу» ыстатыйанан холуобунай дьыала тэриллибитин туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.
+1
+1
+1
+1
+1
+1
+1