Дьокуускай куорат олохтооҕо, 35 саастаах урбаанньыт кибертүөкүттэргэ албыннатан, баһаам харчытын албыннатта.
Ис дьыала министиэристибэтин пресс-сулууспата иһитиннэрбитинэн, эр киһи интэриниэккэ биткоин-инвестициялааһынтан эбии дохуот аахсар туһунан «Газпром нефть» рекламатын көрбүт уонна сайаапка хаалларбыт. Сотору кэминэн кинини кытары «Terra Luna Unite — будущее мира инвестиций» брокерскай фирма «трейдерэ» сибээскэ тахсыбыт. Кини этиитинэн, эр киһи виртуальнай көһүлүөккэ баан каартатын дааннайдарын киллэрэн туран, бастакы усунуоһу — 9900 солкуобайы укпут.
Аныгыс күнүгэр аны атын «брокер» эрийэн, «Any Desk» сыһыарыыны хачайдыырыгар сүбэлээбит. Инньэ гынан түөкүттэр тэйиччиттэн олорон кини ноутбугар киирэр кыахтаммыттар. Салгыы эр киһини «myfin.by», «Platform.tlu-broker.com», «btcbit.net» диэн инвестиционнай саайтарга регистрациялаабыттар. Онно кини пааспарын дааннайдарын киллэрбит. Ол кэннэ «брокердар» 10 тыһ. дуолларга сайаапка оҥорбуттар. Ол сууманы урбаанньыт счетуттан устубуттар. Аны туох эрэ алҕас таҕыста диэннэр, туһааннаах сууманы иккитэ устубуттар.
Оттон саҥа саҕалааччы «инвестор» платформаттан харчытын устаары гыммытыгар аны 5989 дуоллардаах «европейскай нолуогу» төлүөхтээххин диэбиттэр. Урбаанньыт салгыы үп-харчы инвестициялаары гыммыт да, счетугар биир да харчыта хаалбатах. Онон харчытын платформаттан таһаараары кирэдьиит ыларга күһэллибит. Түмүккэ, түөкүттэр сатамматах «инвестортан» 2 010 000 солкуобайын сойботон ылбыттар диэн Ис дьыала министиэристибэтэ иһитиннэрдэ.
Ис дьыала министиэристибэтэ бааннар хаһан даҕаны төлөпүөнүнэн бааҥҥыт хаартатын нүөмэрин, үс сыыппаралааах коду, смс-иһитиннэриинэн кэлэр бигэргэтэр коду уонна атын даҕаны дааннайдары ыйыппаттарын туһунан өссө төгүл сэрэтэн этэр.
!edersaas.ru