Сатал кытыы кыбартаалларын олохтоохторо Жатайтан кэлэн иһэр оптуобус тохтобулугар тахсарга 2-3 килэмиэтири 40-45 мүнүүтэ сатыы хаамаллар. Тохсунньу тоһуттар тымныытыгар кыра оҕолоох дьон оҕолорун салаасканан таһаллар, сиэннэрин көрө кэлбит эбээлэр-эһээлэр итиччэ ыраахха дьиэлэриттэн тахсыбаттар.
edersaas.ru, «Саха сирэ» хаһыат
– 2015 сылтан общественнай тырааныспар Саталга киирэрин туруорсан, ГИБДД, СӨ Тырааныспарын министиэристибэтин, куорат дьаһалтатын кытта мунньах тэрийбиппит. Ол эрээри хамыыһыйа: “Суол тустаах ирдэбилгэ эппиэттээбэт, суолу кэҥэтиэххэ, аспааллыахха, лаампа туруоран сырдатыахха, тротуар оҥоруохха наада”, – диэн быһаарбыта. Бөһүөлэк суола куорат, эрэгийиэн бас билиитигэр киирбэт буолан, суол оҥоруутун Сатал олохтоохторо тус сиэптэриттэн төлүөхтээхтэр. Ардах түстэҕинэ, суолбутун грейдеринэн эрэ астарабыт. Онон билиҥҥи туругунан, Жатайтан кэлэр оптуобус тохтобулун сылаас оҥоруохтаахпыт, онно эмиэ харчы наада. Бөһүөлэк иһинээҕи суол-иис Сатал бас билиитигэр буолан, суолун эмиэ бэйэтэ оҥостуохтаах диэн өйдөбүллээхтэр, ол эрээри улуустан көһөн кэлбит боростуой тыа дьоно ону уйунар кыахтара суох, – диир табаарыстыба бэрэссэдээтэлэ Виталий Шадрин.
Атырдьах ыйын 12 күнүгэр Сатал олохтоохторо кыһалҕаларын туруорсан, куорат баһылыгар Сардаана Авксентьеваҕа киирэ сылдьыбыттара. «Сатал табаарыстыбата бөһүөлэк суолун ирдэбилгэ эппиэттиир курдук оҥоруон иннинэ, оптуобус сырыытын туһунан кэпсэтэрэ эрдэ. Сири бас билээччилэр суолгутун оҥорон баран биирдэ Дьокуускай куорат уокуругун суол-иис управлениетыгар кэлэн, оптуобус сырыытын уһатан биэрэр туһунан кэпсэтиэххитин сөп», – диэн хоруйдаабыта кини.
ВИТАЛИЙ ШАДРИН, «Сатал» табаарыстыба бэрэссэдээтэлэ:
– Биһиги түмсүүбүт атыы- эргиэн салаатыгар киирбэт, ол иһин учаастактары атыылыыр бырааппыт суох. 2017 сыллаахха “Георгий Балакшин уонна Иннокентий Макаров сир учаастагын атыытыгар кыттыгастаахтар” диэн сурах тарҕаммыта. ФСБ, сэлиэстийэлиир кэмитиэт, борокуратуура сылы супту кичэйэн туран, докумуоннары, дьаһалта көмпүүтэрин дьэҥдьийбитэ даҕаны, сокуону кэһиини булбатахтара.
Дьон сир учаастагын ылан баран, бас билиигэ докумуон оҥортороллор уонна атыылыыллар. Сорохтор хас да учаастагы чэпчэки сыанаҕа ылан баран, хос үрдэтэн атыылыыллар. Биһиги табаарыстыба аатыттан сири атыылаабаппыт. 2023 сылга диэри оскуола тутуллуо диэн СӨ Үөрэҕин министиэристибэтэ эрэннэрбитэ.
Федеральнай бырагыраама быһыытынан, 1 500 миэстэлээх өрөспүүбүлүкэҕэ 8 улахан оскуола тутуллуохтаах, ол иһигэр Саталга эмиэ. Дьиҥэр, бигэргэммит былааҥҥа киирбитинэн, Саталга үс оскуола уонна икки оҕо саада тутуллуохтаах. Тула өттүбүтүгэр «Чолбон», «Мечта», «Забота» СОТ уонна элбэх оҕолоохторго бэриллибит учаастактар элбэхтэр. Кинилэр оҕолоро Саталга кэлэн үөрэниэхтэрэ, — диэн кэпсиир.
Түмүк
Оттон Саталга оскуола 2023-2024 сылга уонна оҕо саада 2027-2028 сылга диэри тутуллуохтаах. Биэлсэркэй-акушерскай пуун тутуутун туһунан эмиэ кэпсэтии бара сылдьар. Саталга үксэ элбэх оҕолоох ыаллар уонна улуустан көһөн кэлбит кырдьаҕастар олороллор. Күн бүгүн кинилэр уокка 5,8 мөлүйүөн иэстээх олорон, бөһүөлэк суолун хайдах, хантан харчы хомуйан оҥоруохтарай? Жатай оптуобуһугар тахсаары, чаас кэриҥэ сатыы хаамаллар, кыһын оҕолорун салаасканан таһаллар. Ол иһин манна олорор оҕолор үгүстүк тымныйан, сыыстаран ыалдьаллар. Бу кыһалҕаны быһаарар туһугар бөһүөлэк суолун куорат бас билиитигэр биэриэххэ баара, өскөтүн ол кыаллар түгэнигэр…
Марианна Тыртыкова, «Саха сирэ», edersaas.ru