Өскөтүн Сатал курдук куораттан кытыы сытар ыраах түөлбэҕэ ким эрэ ыалдьан, ыксал тирээтэҕинэ, «Суһал көмө» 2 ГИС диэнинэн сирдэтэн кэлэр эрээри, чааһынай дьиэлэр быыстарынан тустаах аадырыһы буларга бириэмэ барар.
«Сатал» СОНТ Дьокуускай куорат Медицинэҕэ киинигэр киирсэр, олохтоохтор Жатай балыыһатыгар тиийэн көрдөрөллөр, анаалыс туттараллар. Биллэн турар, массыыната суох киһи онно тиийэрэ уустук, балыыһа ыраах. Аны оҕо ыалдьан, быраас ыҥырдахха: «Массыынанан кэлэн ылыаххыт дуо?» – диэн утары ыйыталлар эбит. Онон: “Биэлсэр пууна аһыллара буоллар”, – дэһэллэр олохтоохтор.
АЛЕКСЕЙ ЯКОВЛЕВ, Дьокуускай куорат Медицинэҕэ киинин кылаабынай бырааһа:
– Дьокуускай куорат Медицинэҕэ киинэ Жатайдааҕы салаатын нөҥүө Сатал олохтоохторун доруобуйатын көрөр-истэр. Сатал нэһилиэнньэтэ элбии турарынан сибээстээн, бөһүөлэккэ биэлсэр-акушер пуунун арыйаары, Саталга 5000 м2 иэннээх сир учаастагын биһиги бас билиибитигэр биэрэллэрин туһунан эппиппит. Ол эрэн, Сатал сирэ оҕуруот олордорго анаммыт уонна арендаҕа
турар буолан, бас билиигэ кыайан бэриллибэтэ. Онон биһиги быһаарыыбытынан, Саталга амбулатория тутуллуохтаах уонна быраас баар буолуохтаах. СӨ Доруобуйа харыстабылын министиэристибэтиттэн боротокуол кэлэрин күүтэбит. Амбулаторияны Дьокуускай куорат Медицинэҕэ киинэ бэйэтин эбэтэр федеральнай субсидия үбүгэр тутуоҕа уонна медицинэ оборудованиетынан, бырааһынан, сиэстэрэнэн хааччыйыаҕа. Куорат дьаһалтата эмиэ Сатал нэһилиэнньэтин олоҕо тупсарын туһугар кыһаллан үлэлиир. Ол курдук, баһылык Сардаана Авксентьева аатыгар амбулатория тутуутугар суол нөҥүө, Жатай диэки, учаастак
биэрэллэрин туһунан сурук суруйбуппут. Ол сурукпутун 2019 сыл балаҕан ыйын 2 күнүгэр диэри көрүөхтээхтэр, — диэн этэр.
Онон сотору кэминэн Саталга амбулатория тутулуннаҕына, олохтоохтор Жатайга, куоракка киирэ сатаабакка тута биир сиргэ, дьиэлэриттэн чугас бырааска көрдөрөр кыахтаныа этилэр.
Марианна Тыртыкова, «Саха сирэ» хаһыат, edersaas.ru