Амма улууһун Сатаҕай сэлиэнньэтин олохтоохторо үчүгэй сонунтан сэргэхсийдилэр.
Култуура дьиэтэ саҥа кириэһилэлэр кэчигирээтилэр, светодиоднай экраннанна. Сцената уонна муостата өрөмүөннэннэ. Тупсарыллыбыт, саҥардыллыбыт култуура дьиэтин үөрүүлээхтик арыйыы куйаар ситиминэн ыытылынна диэн СӨ Култуура уонна духуобунай сайдыы министиэристибэтин пресс-киинэ иһитиннэрдэ. Онон тыа сирин дьоно-сэргэтэ астына-дуоһуйа нэһилиэктэрин хорун ырыаларын истибиттэр, тыйаатырдарын туруорууларын көрбүттэр.
СӨ Култуураҕа уонна духуобунай сайдыыга миниистири бастакы солбуйааччы Владислав Левочкин иһитиннэрбитинэн, 2020 сылга федеральнай бүддьүөттэн көрүллүбүт субсидия 26,8 мөл.солк., өрөспүүбүлүкэттэн 2,3 мөл.солк. Үп-харчы тэриллэри саҥардарга уонна өрөмүөҥҥэ анаан ыытыллыбыт.
Оттон култуура-сынньалаҥ тэрилтэлэрин саҥардан оҥоруу 2017 сылтан ыытыллар. Ол түмүгэр, тыа сиригэр сүүстэн тахса киин саҥа уот-күөс, тыас-уус тэриллэринэн, көрөөччүлэр кириэһилэлэринэн, сценаҕа ыйыыр быыһынан уонна да атын наадалаах анал тэриллэринэн хааччыллыбыттар.
Бэлиэтээн эттэххэ, субсидияны ылыы куонкурустаах диэн пресс-киин суруйар. Онно биир сүрүн ирдэбилинэн, култуура дьиэтин материальнай-тэхиньиичэскэй баазатын бөҕөргөтөргө олохтоох муниципалитеттар өйөбүлү оҥоруохтаахтар. Ону таһынан, куонкуруска кыттар култуура дьиэтэ Арассыыйатааҕы, өрөспүүбүлүкэтээҕи күрэстэргэ ситиһиилэрин, уус-уран художественнай самодеятельноска кыттааччы ахсаана элбээбитин, идэлээх исписэлиистэр үлэлииллэрин көрдөрүөхтээх.
+1
+1
+1
+1
+1
+1
+1