Саха АССР 100 сылыгар киэҥ экраҥҥа хас да документальнай, историческай киинэ тахсыаҕа. Бу туһунан бырабыыталыстыба бэрэссэдээтэлин солбуйааччы Сергей Местников тустаах мунньахха иһитиннэрдэ. Вице-премьер муус устар ыйга киинэлэри сүрэхтээһини тэрийэргэ уонна бары киинэ тыйаатырдарыгар көрдөрөргө соруйда. Киэҥ экраҥҥа көстүбүтүн кэннэ, “Саха” НКИХ тэлэбиидэнньэҕэ көрдөрүөхтэрэ. “Чаҕылхай Макисм”, “Былатыан Ойуунускай”, “Исидор Барахов”, уо.д.а. документальнай киинэлэр көстүөхтэрэ.
Бу документальнай киинэлэри уһулуу былаанын былырыын Айсен Николаев бигэргэппитэ. Өрөспүүбүлүкэ уонна федеральнай бүддьүөттэртэн үбүлээһин көрүллүбүтэ.
— Бу киинэлэр өрөспүүбүлүкэбит историятыгар, Өрөспүүбүлүкэ судаарыстыбаннаһа үөскээһинигэр улахан оруоллаах судаарыстыбаннай диэйэтэллэргэ ананаллар. Биһиги сүрүн сыалбыт – дьоҥҥо өрөспүүбүлүкэ үөскээбит историятын, оччотооҕу салайааччылар киллэрбит улахан кылааттарын тиэрдии, — диэн Сергей Местников эттэ.
Култуура, духуобунай сайдыы миниистирин солбуйааччы Владислав Левочкин иһитиннэрбитинэн, 2021 сылга “Федор Попов” (Сэбиэскэй Сойуус Дьоруойа 100 сылыгар ананар), “А как же доброе имя” (судаарыстыбаннай диэйэтэл Илья Винокуров 120 сылыгар ананар), “Истинные законы мироздания” уонна “История в лицах: время и современники”, “История Якутии за 100 лет” документальнай роликтар уһуллан бүттүлэр. Бу күннэргэ “Республика. Часть вторая” документальнай киинэ монтаһа бүтэн эрэр. Төрүт олохтоох норуоттарга анаммыт “Золото Якутии” уонна “От Якутской АССР до Республики Саха (Якутия)” документальнай киинэлэри уһулуу үлэтэ түмүктэнэн эрэр.
Ону тэҥэ, “Сахафильмҥа” “Уроки истории для школьников Якутии” диэн 12 сиэрийэлээх мультимедийнэй документальнай сериал тахсыахтаах. Аудиовизуальнай нэһилиэстибэ национальнай киинэ “200 лет Гордуме” документальнай киинэни бэлэмнээн таһаарыаҕа. Мантан да атын бырайыактары тас сибээскэ, норуоттар дьыалаларыгар министиэристибэ уонна инновация, сыыппара сайдыытын, инфокоммуникационнай технологиялар министиэристибэлэрэ бэлэмниэхтэрэ.
“Саха” НКИХ “Якутия сегодня”, “Исторические личности. Легой Тойон” документальнай киинэлэри, “История в лицах: время и современники” ролигы бэлэмнии сылдьар.
Мунньаҕы түмүктүүрүгэр Сергей Местников кэлэр сылга бу үлэ салҕанарын туһунан иһитиннэрдэ.
Ангелина Васильева, “Саха сирэ” хаһыат, edersaas.ru