Маннык аахсыйаны Өрөспүүбүлүкэтээҕи социальнай хааччыйыы биир кэлим киинин үлэһиттэрэ саҕалаатылар. Киин кэлэктиибэ бэйэлэрин үлэһиттэрин иһигэр волонтердар хамсааһыннарын сайыннаран, кинилэр социальнай-култуурунай көҕүлээһиннэрин үрдэтэн, үбүлүөйдээх сыл устуоруйалаах түгэннэригэр кыттарга быһаарынна.
Киин «САССР 100 сылыгар — 100 үтүө дьыала» аахсыйата алта хайысханан ыытыллара былааннанар.
— «Көмөҕө илиигин уун» -– олох ыарахаттарыгар түбэспит дьоҥҥо (бэтэрээннэргэ, кырдьаҕастарга) көмө;
— «Экология» – тулалыыр эйгэ харыстабылыгар, сири-уоту тупсарарга аналлаах:
— «Чөл олох иһин» -– чөл олоҕу сырдатар тэрээһиннэр;
— «Үтүөнү оҥор» -– аһымал көмө уонна волонтердар хамсааһыннара;
— «Дьоллоох оҕо саас» -– оҕолорго көмөлөһөр дьаһаллар;
— «Патриот» -– патриотизм тыыныгаар иитэргэ хайысхаламмыт тэрээһиннэр.
«Биһиги бэйэбит тус эбээниспэтин сэргэ, эбии эбэһээтэлистибэ быһыытынан бу аахсыйаны ыытыахпыт. Кэккэ дьаһаллар номнуо былааннаннылар. Аахсыйа төрөөбүт өрөспүүбүлүкэбит сайдарыгар биһиги кылааппытынан буолуоҕа», -– диэн киин дириэктэрэ Наталья Пахомова иһитиннэрдэ.
Өрөспүүбүлүкэтээҕи социальнай хааччыйыы биир кэлим киинин үлэһиттэрин үтүө дьыалалара кулун тутар 1 күнүттэн саҕаланыахтара.
Надежда ЕГОРОВА, «Саха сирэ», edersaas.ru