100 сылга — 100 оптуобус.
Өрөспүүбүлүкэ киин куоратыгар, Дьокуускайга, САССР 100 сылынан сүүс саҥа оптуобус күлүүһүн туттарыы үөрүүлээх быһыыга-майгыга буолла. Күлүүстэри СӨ Ил Дархана Айсен Николаев туттарда.
—Куорат оптуобустара саҥардылыннылар, онон бу ураты бэлиэ күн. Бу үлэ саҕаланыыта эрэ буоларыгар эрэнэбин. Быйыл Дьокуускай куоракка уопсастыбаннай тырааныспары салайар саҥа систиэмэ, саҥа маршруттар былааннаналлар, — диэтэ Айсен Николаев.
Федеральнай бүддьүөттэн бу сыалга 193 мөл.солк., өрөспүүбүлүкэттэн 120 мөл.солк. көрүллүбүт. КАвЗ-4270 LE 55 оптуобустан 35-һэ куорат таһыгар дьону таһыа, 20 куорат иһинээҕи саҥа маршрутунан сылдьыахтара. «Вектор NEXT 8.8» 35 оптуобус куорат иһинээҕи маршрутунан сылдьыа. КАвЗ-4238 уон оптуобус оройуоннар икки ардыларынааҕы айаҥҥа, холобур «Дьокуускай-Покровскай-Мохсоҕоллоох-Дьокуускай», «Дьокуускай-Нам-Хатырык-Дьокуускай», «Дьокуускай-Маҕарас-Бэрдьигэстээх» суолларынан айаҥҥа сылдьаллара былааннанар. Оптуобустар РФ Минпромторг өйөбүлүнэн «САССР 100 сылыгар — 100 оптуобус» эрэгийиэннээҕи бырагырааманан ылылыннылар. Көлөлөр Курганнааҕы уонна Павловскайдааҕы оптуобус собуоттарыгар оҥоһуллубуттар. Хотугу сир усулуобуйатыгар сөп түбэһэллэр.