Тыа сирин нэһилиэктэрэ тыа хаһаайыстыбатын сайдыытын бырагырааматын ылынан үлэлииллэрэ көдьүүстээх буолар эбит. Ол курдук, Дьааҥы улууһун Сартаҥ нэһилиэгин (баһылык Н.В.Слепцова) бу ылыммыт бырагыраамаларын чэрчитинэн быһыты оҥорууга, бүтэйи тутууга уо.д.а. бэркэ дьаһанан олороллор.
Ол туоһутунан быйылгы кыстыкка бэйэлэрин отторунан этэҥҥэ кыстаан эрэллэр. Онуоха бу ааспыт 3 сыл устата сайын быһыттарын оҥорон, үрүйэлэрин уутун киллэрбиттэрэ төһүү буолбут. Быһата, кураан сыллар иһэллэринэн хаар ууллуутун саҕана ууну хаайан, сири ньүөлсүтүүнэн бэркэ дьарыктаммыттар. Олохтоохтор бу ыытыллар үлэлэргэ тэриллэр субуотунньуктарга көхтөөхтүк кыттыбыттар. Ол түмүгэр от үчүгэйдик үүнэн, үс сыллааҕыта курдук от атыылаһар кыһалҕа аны билиҥҥитэ тирээбэт. Бу бырагыраамаларынан 20 км ыраах сиргэ оттуур дьоҥҥо отторун тиэйиитин аҥаарын уйуналлар. Тыа дьонугар олус бэрт көмө эбит.
Сартаҥҥа быйылгы кыстыкка 339 хороҕор муостаах кыстаан турар, итинтэн ынаҕа –163. 537 сыспай сиэллээх баар. Сүөһү төрүөҕэ элбиирин туһугар нэһилиэккэ оҕус баар буолуутугар болҕомто ууруллубут. Онон манна биэс оҕус айаатыыр. Атыыр оҕус төбөтүгэр эмиэ бырагырааманан 25-тии тыһ. харчы көрүллүбүт.
Муус устар ый ортотун диэкиттэн суоллара сабыллар, онон суолу баттаһа таһаҕастарын, астарын-үөллэрин, тутуу матырыйаалын тиэйиини хааччыналлар.
Кэлэр кыстыкка “Ферма” диэн түөлбэ кииннэммит ититии ситимгэр холбонуохтаах. Онон сибээстээн хочуолунайга өрөмүөн барыаҕа. “СӨ ОДьКХ “ ГУП көмөтүнэн. Сартаҥнар маннык дьоһуннук тэринэн олороллор.
Бэлэмнээтэ Женни Стрюкова
Хаартыскалары: нэһилиэк дьаһалтата ыытта.