Дьааҥы улууһун Сартаҥ нэһилиэгэр “Эрэл” эр дьон түмсүүтэ иллэрээ күн бэртээхэй күрэхтэһиини тэрийдэ.
Ол курдук, оскуола үрдүкү кылааһын үөрэнээччилэрэ “Хайа сахалара”, “Урааҥхайдар”, “Айылҕа оҕолоро” уонна “Кустуктар” хамаандаларга хайданнар туут хайыһарынан сүүрүүгэ, маһы эрбээн хайытан, саһааны туруорууга күрэхтэстилэр. Бэрт ыһыылаах-хаһыылаах, эрийсиилээх сытыы киирсии түмүгүнэн, Егор Гаврильев баһылыктаах “Айылҕа оҕолоро” хамаанда бастаан таҕыста. Улахан дьоҥҥо булт саатын ыһыыга-хомуйууга “Эрэл” түмсүү көхтөөх чилиэнэ Афанасий Слепцов кыайда. Оттон сыал ытыытыгар кини бииргэ төрөөбүт эдьиийэ Лариса Слепцова тэҥнээҕин булбата. Күнүскү омурҕаҥҥа бары мустубут дьону “Сарыал” түөлбэ солбуллубат асчыта Евгения Семенова араас бурдук аһынан, оттон Мария уонна Юрий Новиковтар үөлүллүбүт этинэн күндүлээтилэр. Кыайыылаахтар бириистэринэн бэлиэтэннилэр. Аны кус кэллэҕинэ, “МП-3” радиоприемник бириистээх “Маҥнайгы кус” анал аат хаһаайынын кэтэһэр!
Дьааҥыттан Табайаана, “Саха сирэ”, edersaas.ru сайтка анаан