Сарсын ультрамарафонец тымныыттан хайдах быыһаммытын кэпсиэҕэ

Ультрамарафонец, Италия полициятын үлэһитэ Паоло Вентуринины кытары сарсын Национальнай бибилэтиэкэ историяҕа саалатыгар көрсүһүү буоларын туһунан СӨ Тас сибээскэ уонна норуоттар дьыалаларыгар министиэристибэтэ иһитиннэрдэ.

Соторутааҕыта күннээх Италия спортсмена биһиэхэ таһырдьа 52 кыраадыс тымныы буолан турдаҕына, Томтортон Өймөкөөҥҥө диэри 39 килэмиэтири сүүрбүтэ. “Monster Frozen” (“Монстр Мороз”) бырайыак чэрчитинэн тэриллибит сүүрүүнү СӨ Бырабыыталыстыбата, Арассыыйаҕа Италия дипломатиятын бэрэстэбиитэллэрэ уонна Италия полицията өйөөбүттэр.

Бырайыак быһыытынан ультрамарафонец Саха сиригэр аан бастаан кэлиититтэн саҕалаан документальнай киинэ уһулла сылдьар диэн этэллэр. Киинэ Италия уонна норуоттар икки ардыларынааҕы ханаалларга, киинэ бэстибээллэригэр көрдөрүллүөхтээх. Санатар буоллахха, Вентурини былырыын олунньуга манна кэлэ сылдьан, 40 кыраадыс тымныыга, бэлэмнэнэ таарыйа сүүрэн көрбүттээх. Ол кэннэ, сайын ыһыахха сылдьан сүүрүөхтээх суолун бэлиэтээбит.

Киинэ, кутталлаах суолга бэлэмнэнии, тымныыга тыыннаах хааларга аныгы араас албастар, ньымалар, рекорду олохтооһун, хамаанда үлэтин туһунан Паоло Вентурини, кини ассистена Казимира Кабрал Перес, бырайыагы тэрийээччи Ольга Каменева, быраас Андреа Гасперетти, видеооператордар Марко Рочелла уонна Маттео Менапаче көрсүһүүгэ кэлбит дьоҥҥо сиһилии кэпсиэхтэрэ. Сэргээбиттэр, сэҥээрбиттэр марафон туһунан видеоматырыйааллары USB-лаах кэлэн ылыаххытын сөп.

Биһиги корр., «Саха сирэ» хаһыат, edersaas.ru

Хаартыскалар: интэриниэттэн