Дьокуускай куоракка нэһилиэнньэ олоҕун хаачыстыбатын тупсарар уонна уһатар туһугар «Саха сиригэр уһун үйэлэнии» ааксыйа ыытыллар.
edersaas.ru
Аҕам саастаах дьон аан дойдутааҕы күнүгэр анаан ыытыллар ааксыйа икки түһүмэҕинэн барыаҕа. Бастакы түһүмэх алтынньы 6 күнүгэр, онтон иккис түһүмэх алтынньы 20 күнүгэр буолуохтара.
Бастакы түһүмэх аҕам саастаах дьон доруобуйатын бэрэбиэркэлиир, Персонализированнай медицина киинигэр салгыы чинчийиигэ ыытар дьону талар соруктаах. Бу түһүмэх П.Ойуунускай аатынан Саха тыйаатырын иккис этээһигэр
алтынньы 6 күнүгэр 10.00-14.00 ч.
тэриллиэҕэ.
Манна Дьокуускай куорат, өрөспүүбүлүкэ сүрүн эмтиир тэрилтэлэрэ, медицина институтун клиниката, РМНА Сибиирдээҕи салаатын биир кэлим медицинскэй проблемалар Саха сиринээҕи научнай кииннэрэ, өрөспүүбүлүкэтээҕи 3 нүөмэрдээх балыыһа Персонализированнай медицина киинэ, медик-волонтердар, СӨ педагогическай этэрээтэ кыттыахтара. Кинилэргэ хаан баттааһынын бэрэбиэркэлэтиэххэ, саахарга анаалыс ылыахха, эндокринолог, пульмонолог, офтальмолог, гериатр, невролог, нейропсихолог быраастарга, клиническэй психологка уо.д.а. көрдөрүөххэ сөп.
10.30-13.30 чааска диэри научнай-популярнай лиэксийэҕэ сылдьан, чөл олох, уопсай аһылык, хаан үрдээһиниттэн, остепорозтан харыстаныы уонна Саха сиригэр мутация ыарыыларын сэрэтии тустарынан элбэҕи билиэххит.
Ааксыйа бастакы түһүмэҕэр медицинскэй чинчийиини ааспыт дьон салгыы Персонализированнай кииҥҥэ (Киров уул. 34 дьиэтин аактабай саалатыгар) көрдөрөллөрүгэр кыах бэриллэр. Кинилэргэ фармаколог-быраас уонна психолог-быраас тестирование түмүктэринэн сүбэ-ама биэриэхтэрэ.
Күһүҥҥү сылаас күннэргэ ааксыйаҕа кыттан, кыһыны чэгиэн доруобуйалаах көрсүҥ.
Надежда ЕГОРОВА, «Саха сирэ» хаһыат, edersaas.ru