Дойду киин куоратыгар Үп форума «Манеж» киин быыстапкалыыр саалатыгар ыытыллыаҕа.
Форуму Үп министиэристибэтэ уонна Москва бырабыыталыстыбата тэрийэллэр. Форумҥа федеральнай уонна эрэгийиэннэрдээҕи былаас уорганнарын, бизнес, уопсастыбаннай тэрилтэлэр бэрэстэбиитэллэрэ, экэниэмикэ экспертэрэ кыттыыны ылыахтара. Арассыыйа уонна аан дойду экэниэмикэлэригэр пандемия хайдах сабыдыаллаабытын туһунан кэпсэтиэхтэрэ. Ону таһынан билиҥҥи улахан күрэстэһии кэмигэр дойду экэниэмикэтин, үп-харчы ырыынагын кэскилин, үп-харчы хамсааһынын, үлэни-хамнаһы тэрийиини көҕүлүүр ырычаахтар, кыахтар тустарынан санаа атастаһыахтара.
Санатан эттэххэ, Москватааҕы Үп форума быйыл бэһис төгүлүн тэриллэр, дойду экэниэмикэҕэ бэлиитикэтин уо.д.а. ырытыыга, саҥа ырычаахтары тобулуу биир былаһаакката буолар диэн форум пресс-сулууспата иһитиннэрэр.
Раиса Сибирякова, «Саха сирэ», edersaas.ru