Атырдьах ыйын 4 күнүгэр «АЛРОСА» аахсыйаламмыт хампаанньа «Мир» руднигар тахсыбыт саахалга былдьаммыт аҕыс горняк аймахтарыгар уонна чугас дьонноругар дириҥ кутурҕанын тиэрдэн туран, Ил Дархан Егор Борисов Саха өрөспүүбүлүкэтигэр 2017 сыл атырдьах ыйын 29 күнүн кутурҕан күнүнэн биллэрэр туһунан ыйаахха илии баттаата.
Онон, бу күн өрөспүүбүлүкэ бүттүүнүн үрдүнэн Россия Федерациятын уонна Саха Өрөспүүбүлүкэтин судаарыстыбаннай былаахтара аллара санньытыллаллар. Дьону көччүтэр дьаһаллар, оонньуулар, кэнсиэртэр тохтотуллаллар. Дьокуускайга Аммосов уул. 8 №—гэр, «АЛРОСА» хампаанньа бэрэстэбиитэлистибэтин дьаһалтатын дьиэтигэр, «Мир» рудникка сүппүт аҕыс киһи сырдык кэриэһигэр Кутурҕан эркинэ туруоруллуоҕа. Куорат олохтоохторо уонна ыалдьыттара былаҕайга былдьаммыт дьону кэриэстээннэр, Кутурҕан эркинигэр тыыннаах сибэккилэри ууруохтара, чүмэчилэри уматыахтара.
Горняктары кэриэстиир дьаһаллар Москваҕа уонна Санкт-Петербурга баар өрөспүүбүлүкэ бастайааннай бэрэстэбиитэлистибэлэригэр эмиэ ыытыллыахтара.
“Саха сирэ” хаһыат, edersaas.ru
+1
+1
+1
+1
+1
+1
+1