Сарсын Кубалаах күөлгэ куорат дьоно күөгүнэн балыктааһыҥҥа күрэхтэһиэхтэрэ

Субуотаҕа, от ыйын 21 күнүгэр, Дьокуускай куорат Курашов уулуссатын 46-с нүөмэрдээх дьиэтин аннынан сытар, дьоҥҥо-сэргэҕэ Щорс Күөлүнэн биллэр “Кубалаах күөл” экопаарка акваториятыгар күөгүнэн балыктааһыҥҥа күрэхтэһии ыытыллар. Сонун күрэхтэһиини булчуттарга уонна балыксыттарга аналлаах “Байанай” сурунаал эрэдээксийэтэ СӨ булчуттарын уонна балыксыттарын уопсастыбаларын сойууһун киин бырабылыанньатынаан кыттыһан тэрийэллэр.

Биирдиилээн уонна хамаанданан кыттыахха сөп. Хамаандаҕа 3 киһи (сааһынан уонна уол-кыыс, эр киһи-дьахтар диэн хааччаҕа суох) киирэр. Хамаанда ааттаах буолуохтаах уонна биир моһуоннаах таҥаһы кэтэллэрэ өссө ордук. Биир кыттааччы дагдатардаах (поплавоктаах) биир күөгүнэн (солбукка хаһы баҕарар аҕалара хааччахтаммат) балыктыыра көҥүллэнэр. Күөгүһүттэр кытылга туран балыктыыллар.

Кыттааччылар ыйыллыбыт күн киэһэлик 4 чаастан мусталлар. Күрэхтэһии 5 чаастан саҕаланар уонна икки чаас кэриҥэ ыытыллар. Улахан дьон усунуоска 1,5 мөһөөҕү төлүүллэр, оҕолор босхо кытталлар. Түмүк биирдиилээн уонна хамаанданан таһаарыллар. Кыайыылаах хаптарыллыбыт балык (собо, быччыкы, мунду, күстэх) бүттүүн ыйааһынынан быһаарыллар. Хамаанданан уонна биирдиилээн бастаабыттарга, миэстэлэспиттэргэ бириистэр туттарыллыахтара. Ону таһынан кыттааччылары “Бастакы балык”, “Саамай улахан балык”, “Саамай эдэр балыксыт”, “Балыксыт дьиэ кэргэн” анал бириистэр күүтэллэр.

Василий НИКИФОРОВ, «Саха сирэ» хаһыат, edersaas.ru