Маны аах Тырааныспар

Сарсын киин куораппыт Ленин проспегар өссө биир учаастак сабыллыаҕа

СӨ тырааныспарга миниистирэ Владимир Сивцев иһитиннэрбитинэн, «Сарсын, кулун тутар 22 күнүттэн, Ленин проспегар Курашов уонна Короленко уулуссалар учаастактарыгар тимир көлөлөргө сырыы тохтуоҕа», — диэн иһитиннэрдэ.

Ленин уулуссатын өрөмүөнэ сайын устата ыытыллыаҕа.  Учаастактар кыраапык быһыытынан сабыллыахтара, аһыллыахтара. Санатар буоллахха,  Ленин проспегынан тимир көлөлөр сырыылара  2021 сыл балаҕан ыйыттан сабыллыбыта. Хапытаалынай өрөмүөн 2023 сылга диэри ыытыллыаҕа.

Дьокуускай куорат сайдар, тупсар. Ону бары бэркэ диэн көрө-истэ сылдьабыт. Холобур, былырыыҥҥыттан Ленин уулуссатыгар улахан өрөмүөн бара турарыттан, биллэн турар, массыыналар сырыыларыгар хааччахтар үөскээтилэр. Сырылас куйааска массыына иһигэр итииргээн «буһар» эбиппит диэччилэр элбэхтэр.  Төһө кыалларынан, тулуйарбытыгар тиийэбит. Сотору этэҥҥэ түмүктэниэҕэ.

Быйыл Дьокуускай куораппытыгар   38 уулусса саҥардыллыа, хапытаалынай өрөмүөн ыытыллыаҕа, бу барыта  38 км тэҥнэһэр. Бу туһунан ааспыт нэдиэлэҕэ СӨ тырааныспарга миниистирэ Владимир Сивцев социальнай ситимнэринэн быһа эпииргэ кэпсээбитэ.

Үөһэ этэн аһарбыппыт курдук, Ленин уулуссатыгар улахан өрөмүөн бара турар. Бу күннэргэ  Орджоникидзе уонна Курашов уулуссалар учаастактарыгар суол сүрүн болотунатын уларытыы түмүктэннэ. Санатар буоллахха, бырайыак сыаната 1,5 млрд солк. тэҥнэһэр. Сүрүн проспект балачча үчүгэйдик өрөмүөннэниллиэҕэ, ол курдук, тротуардар саҥардыллыахтара, бэлисипиэт ыллыга баар буолуо, маһы, талаҕы олордуу үлэтэ күүскэ ыытыллыаҕа.

Куорат атын уулуссаларыгар  өрөмүөн  эмиэ ыытыллыаҕа. Холобур, Пирогов уонна Очиченко уулуссаларыгар  өрөмүөн саҕаланыаҕа.  Ону тэҥэ,  Можайскай уулуссаҕа улахан өрөмүөн ыытыллан,  түөрт балаһалаах буолуоҕа уонна  өрөспүүбүлүкэтээҕи Намныыр суолга диэри түөрт балаһаланан тиэрдиллиэҕэ. Оччоҕуна Үс Хатыҥҥа ыһыахтыы барарбытыгар, тимир көлөлөр  уһун-унньуктаах уочараттара үөскүө суоҕа. Бу үлэлэр 2024 сылга түмүктэниэхтэрэ.

0
0
Telegram @edersaas20