От ыйын 3 күнүгэр ыытыллар, Саха сирин нэһилиэнньэтигэр, өбүгэ саҕаттан олохторун устуоруйатыгар аан бастаан буолар Төрүччү сийиэһигэр бэлэмнэнии үлэтэ барбыта икки сылтан орто. Бу сийиэс ыытыллыыта — олох ирдэбилэ.
Сарсыарда 9 чаастан Суорун Омоллоон аатынан Опера уонна балет судаарыстыбаннай тыйаатырыгар Саха сирин олохтоохторун төрүччүлэрин туһунан кэпсиир нэһилиэктэр, мусуойдар, библиотекалар уонна кинигэ таһаарааччылар быыстапкалара үлэлиэҕэ.
Салгыы 9 ч.30 мүнүүтэттэн 3 сиринэн: Опера уонна балет тыйаатырыгар “Нэһилиэктэринэн төрүччү электроннай архыыбын оҥорууга судаарыстыбаннай былаас, олохтоох салайыныы уорганнара уонна уопсастыбаннас бииргэ үлэлээһиннэрэ”, СӨ Наукаларын академиятын (Ленин пр., 33) аактабай саалатыгар “Өбүгэлэрбит духуобунай нэһилиэстибэлэрин холобурдарыгар ыччаты патриотическай иитии”, Ем.Ярославскай аатынан Судаарыстыбаннай мусуойга (Ленин пр., 5/2 к.2) “Саха сирин норуоттарын ХVII-ХIХ үйэлэрдээҕи аҕа уустарын төрүччүлэринэн сибээстэрэ” тиэмэлэргэ сиэксийэлэринэн үлэ ыытыллыаҕа.
12ч. Мусуой тэлгэһэтигэр төрүччү сийиэһин “Өйдөбүнньүк сэргэтэ” туруоруллуоҕа.
14 ч. 30 мүн. Суорун Омоллоон аатынан Опера уонна балет судаарыстыбаннай тыйаатырыгар сийиэс пленарнай мунньаҕа, 16ч.30 мүн. сийиэс түмүктэрин таһаарыы, Доҕордоһуу болуоссатыгар оһуохай буолуоҕа.
Константин АРГУНОВ, Саха сиригэр Төрүччү электроннай архыыбын оҥоруу идиэйэтин ааптара, Хотугу омуктар төрүччүлэрин үөрэтэр-чинчийэр уопсастыбаннай научнай институт дириэктэрэ:
—Төрүччү бастакы сийиэһигэр Саха сирин улуустарыттан, нэһилиэктэриттэн 250 дэлэгээт уонна төрүччүнү оҥорууга сыһыаннаах дьон, кыраайы үөрэтээччилэр, музееведтар, култуура, үөрэх үлэһиттэрэ, нэһилиэктэр баһылыктара, уопсастыбаннас кыттыаҕа. Сийиэс түмүгүнэн резолюция ылыныахпыт, институппут иһинэн Төрүччүнү оҥорооччулар холбоһуктара тэриллиэҕэ.
Биһиги сийиэспит аһаҕас – ким төрүччүнү оҥорууну өйүүр, сэргиир, сэҥээрэр бука бары кэлэн кыттыахтарын, истиэхтэрин, санааларын үллэстиэхтэрин сөп.
Татьяна МАРКОВА, «Саха сирэ» хаһыат, edersaas.ru