Кулун тутар 12 күнүгэр, Бурятия Өрөспүүбүлүкэтин үтүөлээх артыыстара Зоригто уонна Нонна Тогочиевтар айар үлэлэрин 25 сылыгар анаан, Саха сирин көрөөччүлэригэр соҕотох кэнсиэри бэлэхтиэхтэрэ.
Зоригто уонна Нонна Тогочиевтар тыйаатырдарын хас биирдии бырайыага – ускуустуба ураты эйгэтэ. Манна Европа уонна Арҕаа дойдулар кырааскалара, эрчимнэрэ бииргэ түмүллэр. Кинилэр кэнсиэртэригэр кэлбит көрөөччү сылайар, салҕар диэни билбэккэ, тапталлаах ырыаһыттарын хас да чааһы быһа истиэн сөп.
Бурятияҕа киэҥник сураҕырар дуэт быйылгы үбүлүөйдээх кэнсиэригэр уонунан сыллар тухары доҕордоһор артыыстара кыттыахтара. Ол курдук, Саха сирин эстрадатын ырыаһыттара Наталья Кривошапкина-Далаана, Варя Ларионова-Ый кыыһа, Варя Аманатова-Алаас кыыһа, Валентина Романова-Чыскыырай, Александр Дьячковскай-Саарын кыттыһан, Саха сирин уонна Бурятия эстрадаларын чаҕылхай сулуһун уматыахтара.
Үбүлүөйдээх кэнсиэр Өксөкүлээх Өлөксөй аатынан Норуоттар доҕордоһууларын дьиэтигэр киэһэ 18.00 чаастан саҕаланыа.
Надежда ЕГОРОВА, “Саха сирэ” хаһыат, edersaas.ru
Тэрийээччилэр хаартыскалара туһанылынна