Сарсыҥҥыттан Дьокуускай куорат үрдүкү кылаастара олоҕурбут көрүҥүнэн үөрэниэхтэрэ...
· - Олох-дьаһах - Саха ыала

Сарсыҥҥыттан Дьокуускай куорат үрдүкү кылаастара олоҕурбут көрүҥүнэн үөрэниэхтэрэ

Сыл аҥаарын устата дьиэҕэ олорбут Дьокуускай куорат үөрэнээччилэрэ сарсыҥҥыттан оскуолаҕа баран үөрэниэхтэрэ. Ити туһунан Дьокуускай куораттааҕы үөрэх управлениетын бирикээһигэр ыйыллар.

edersaas.ru

Тустаах бирикээскэ олоҕуран, балаҕан ыйын 21 күнүттэн, Дьокуускай куорат уокуругун оскуолаларын 5-с уонна 9-11-с кылааһын үөрэнээччилэрэ оскуолаҕа миэстэтигэр тиийэн (очно) үөрэниэхтэрэ. Ол эрээри, төрөппүттэр сайабылыанньаларынан оҕо дистанционнайынан үөрэнэрэ көҥүллэнэр. Маныаха хамсык дьаҥын утары ыытыллар туох баар миэрэ барыта тутуһуллар. Оҕолор ханнык кылааска үөрэнэллэрэ, хайа аанынан киирэллэрэ-тахсаллара, симиэнэлэр хастан саҕаланаллара барыта быһаарыллыбыт.

Санатан эттэххэ, балаҕан ыйын 1 күнүттэн алын кылаас оҕолоро бары олоҕурбут көрүҥүнэн (очно)  үөрэнэн кэллилэр.

Онтон 6-8-с кылаастарга ыраахтан олорон үөрэнии (дистанционно) көрүҥэ салҕанар. Дьаҥ кэмигэр оскуолаҕа миэстэтигэр үөрэтиини ити курдук сыыйа киллэрэн эрэллэр. Эрдэ иһитиннэрбиттэринэн, коронавирус дьаҥа баара биллэр түгэнигэр, оскуоланы барытын буолбакка, ыалдьыбыт оҕо үөрэнэр кылааһын эрэ харантыыҥҥа ыыталлар.

 

Людмила ПОПОВА, “Саха сирэ” хаһыат, edersaas.ru

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

4 + 7 =