Коронавирус дьаҥыгар суутуллуу саамай кутталлаах балаһыанньата Дьокуускай куоракка үөскээтэ.
edersaas.ru
Бу туһунан Ил Дархан Айсен Николаев күнүскү иһитиннэриитигэр тоһоҕолоон бэлиэтээтэ.
— Өрөспүүбүлүкэтээҕи оперативнай ыстаап бүгүҥҥү мунньаҕыттан тахсаат, иһитиннэрии оҥоро турабын. Ааспыт нэдиэлэтээҕи чахчынан 59 киһи Дьокуускай куоракка коронавирус дьаҥыгар сыстыбыт. Хомойуох иһин, куорат мээрэ Сардаана Авксентьева бэлиэтээбитинэн, билигин да уулуссаларга, маҕаһыыннарга, оптуобустарга, уопсастыбаннай сирдэргэ мааската суох сылдьар суох сылдьар киһи үгүс. Онон сибээстээн мин сарсыҥҥыттан ыла мааската суох сылдьыыны бобор туһунан дьаһал ылынным. Ол эбэтэр Дьокуускайга, Аллараа Бэстээххэ, Тиксиигэ, Мииринэйгэ, Алдан уонна Нерюнгри оройуоннарыгар уопсастыбаннай сирдэргэ булгуччу мааскалаах сылдьыы эрэсиимэ олохтонор.
Бу маннык хааччахтыыр болдьох үтүө түмүктээҕэ билиннэ. Ол курдук, Алдан оройуонугар харантыын биллэриллиэҕиттэн ыла биир да сыстыганнаах дьаҥҥа сутуллуу түбэлтэтэ биллибэтэ.
Буолаары турар ыам ыйынааҕы бырааһынньыктарга дьиэҕэ олорор эрэсиими булгуччу тутуһуу ирдэнэр. Билигин маассабайдык тыаҕа тахсар араас тэрээһиннэри, күүлэйи, сынньалаҥы тохотор хайаан да наада. Кытаатан ыарахан ыарыы күн-түүн элбии турарын көрө-истэ сылдьан, бэйэҕитин туттунуҥ, чугас дьоҥҥутун харыстааҥ, — диэн Ил Дархан Айсен Николаев бар-дьонугар санаатын тиэртэ.
Кырдьык, туох кистэлэ кэлиэй, билигин инстаграмҥа, фейсбукка, батсаапка ким ханна төрөөбүт күннүү, шашлыктыы, хайаҕа дьаарбайа сылдьарын устан, хаартыскаҕа түһэрэн ыыталларын көрө-истэ олорон, араас санаа үөскүүр. Кыратык тулуйа түһэн, ыарыы саамай кутталлаах кэмигэр ирдэбили тутуһан олоро да түһүөххэ баара! Социальнай ситимнэргэ күүлэй хаартыскаларын ыытааччылар, дьиэҕэ олоруу эрэсиимин тутуһан олорор дьон кинилэр тустарынан тугу саныыылларын сэрэйбэттэрэ дуу? Дьиҥэр бары биир кыһалҕаҕа ылларан олоробут эбээт…
Елена ПОТОЦКАЯ, «Саха сирэ» хаһыат, edersaas.ru
Хаартыска — «Эдэр саас» саайтан.