Бу сарсыарда 10 ч 15 мүнүүтэҕэ Өрөспүүбүлүкэтээҕи медиа-кииҥҥэ Саха Өрөспүүбүлүкэтин Киин быыбардыыр хамыыһыйатын бэрэссэдээтэлин солбуйааччы Иван Андросов РФ бэрэсидьиэнин быыбарын хаамыытыгар пресс-конференция биэрдэ.
edersaas.ru
Кулун тутар 18 күнүн сарсыардатын туругунан өрөспүүбүлүкэ быыбардыыр учаастактарыгар испииһэккэ 634580 быыбардааччы киирбит, ол иһигэр Дьокуускай куоракка – 195084 быыбардааччы.
Өрөспүүбүлүкэ 6 хотугу оройуонун – Абый, Аллайыаха, Аллараа Халыма, Орто Халыма, Үөһээ Халыма уонна Муома 44 быыбардыыр учаастактарыгар куоластааһын 2 чааһынан эрдэ саҕаланна. Оттон 3 оройуоҥҥа – Дьааҥыга, Өймөкөөҥҥө уонна Усуйаанаҕа – 1 чааһынан эрдэлээн.
Холобур, сарсыарда 10 чааска, Анаабыр улууһун быыбардааччыларын 47,8 бырыһыана хайыы үйэҕэ быыбардаабыт. Манна болдьоҕун иннинэ быыбардааччылар эмиэ киирэллэр.
СӨ Киин быыбардыыр хамыыһыйатын бэрэссэдээтэлин солбуйааччы Иван Андросов иһитиннэрбитинэн, сарсыарда 10 ч туругунан, РФ Бэрэсидьиэнин быыбарыгар Саха сирин быыбардааччытын 10, 13 бырыһыана кытынна.
Өскөтүн тэҥнээн көрдөххө, бу көрдөрүү 2012 сыллаахха 8 бырыһыаҥҥа тэҥнэспит эбит буоллаҕына, быйылгы быыбарга нэһилиэнньэ быдан көхтөөҕө көстөр.
Пресс-конференцияҕа кыттыыны ылбыт СӨ Уопсастыбаннай палаататын Бэрэссэдээтэлэ Алексей Сергучев бэлиэтээбитинэн, бу сарсыардааҥҥы туругунан, уопсастыбаннай кэтээн көрөөччүлэр өттүлэриттэн үҥсүү суох. Быыбар бара турар.
Татьяна МАРКОВА, edersaas.ru