Саргылана Максимова: “Мисс ХИФУ” аатын сүкпүппүттэн олус үөрдүм»...
Олох-дьаһах

Саргылана Максимова: “Мисс ХИФУ” аатын сүкпүппүттэн олус үөрдүм»

Соторутааҕыта Саха сирин сүрүн үөрэҕин кыһатыгар – М.К. Аммосов аатынан Хотугулуу-­Илиҥҥи федеральнай университекка “Мисс ­­уонна Мистер ХИФУ” диэн сыллата ыытыллар кэрэ буолуу уонна талаан куонкуруһа буолла. Урукку сылларга тэҥнээтэххэ тэрээһин да, кыт­тааччылар таһымнара да биллэ үрдээбитэ тута харахха быраҕыллар.

Үс нэдиэлэлээх куонкурус түмүгэр кыайыылаахтарынан инженернэй-тиэхиньиичэскэй институт иккис кууруһун устудьуона Николай Дьяконов уонна үп-экэ­ниэмикэ институтун үһүс кууруһун устудьуона Саргылана Максимова буоллулар.

Саргылана Максимова — «Мисс ХИФУ-2019»

Университекка үөрэх, баһылаары сылдьар идэтин, куонкурус кэнниттэн санааларын туһунан кыа­йыылаах Саргыланалыын кэпсэттибит.

— Саргылана, устудьуоннуур сылларгар маннык аакка тиксибитиҥ биир умнуллубат түгэн буоллаҕа.
— Оннук, мин “Мисс ХИФУ” аатын сүкпүппүттэн олус үөрдүм. Түөрт түһүмэхтээх күрэхтэһии ­буолла – өй, спорт, талаан уонна финал. Мин санаабар, маннык күрэхтэһиилэргэ үчүгэйдик бэлэмнэммит киһини эрэ ситиһии кэтэһэр. Онон, хас биирдии түһүмэххэ дьаныһан туран эрдэттэн оҥостубутум, бэлэмнэммитим. Бииргэ күрэхтэспит оҕолорбут бары да бииртэн биир талааннаах, кыахтаах буолан биэрдилэр. Сылын аайы “Этап Х” диэн кистэлэҥ түһүмэх буолар, быйыл ол социальнай ситим тиэмэтигэр сыһыаннаах ­буолла. Миэхэ “снэпчат” түбэспитэ, бу түһүмэҕи ордук сөбүлээтим.

— “Мисс ХИФУ” аатын ылбытыҥ таһынан, бу куонкурус эйиэхэ тугу биэрдэ?
— Бу куонкурус миэхэ саҥа доҕоттору, олоҕум тухары умнуллубат түгэннэри, элбэх уопуту биэрдэ. Үс нэдиэлэ устата маастар-кы­лаастарга, араас көрсүһүүлэргэ, фотосессияларга сырыттыбыт. Күн аайы бэйэбэр саҥаны ­арыйдым, билиим-көрүүм кэҥээтэ. Устудьуоннуур сылларбар биир саамай чаҕылхай түгэн буолла.

— Оттон “кэрэ буолуу” диэни хайдах өйдүүгүн? Бэйэҕин бары өттүнэн кэрэ киһинэн ааҕынаҕын дуо?
— “Кэрэ буолуу” киһи тас көстүүтэ эрэ буолбакка, ис са­­наалыын ыраас, чэгиэн турук­таах буолуохтаах диэн этиини кытта сөпсөһөбүн. Бары өттүнэн сайдыылаах, үтүө санаалаах киһи буоларга дьулуһабын.

— Төрөппүттэриҥ туһунан кэпсээ. Эн иитиигэр туохха болҕомтолорун уураллар этэй? Хайдах ииппиттэрэй?
— Төрөппүттэрим Варвара Афанасьевна уонна Иван Николаевич Максимовтар мин оҕо эрдэхпиттэн үөрэххэ тардыһыылаах, араас дьарыктаах буоларбар олус кыһаллаллара. Ол курдук, үҥкүүлээн, ыллаан, спордунан дьарыктана улааппытым, кыра кы­­лаастартан араас күрэхтэһиилэргэ ситиһиилээхтик кыттабын. Мин иитиибэр улахан болҕомтону уурбуттарыгар төрөппүттэрбэр махталым муҥура суох.

— Саргылана, бииргэ төрөөбүт эдьиийиҥ Лена Максимова 2010 сыллаахха эмиэ бу куонкурус кыайыы­лааҕа буолан, “Мисс СГУ” аатын сүкпүт эбит дии.
— Бииргэ төрөөбүт икки ­­эдьиийдээхпин, Женялаах Лена миигин куруук өйүүллэр, барытыгар күүс-көмө буолаллар. Лена бу куонкуруска кыттарбар сыанаҕа хайдах тутта-хапта сылдьарга сүбэ-ама биэрбитэ.

— Туох былааннардааххын? Ханнык идэҕэ үөрэнэҕин?
— Хас биирдии киһи олоҕор үп-харчы суолталаах, бары ааҕына-суоттуу сылдьабыт. Экэнэмиис идэтин талбыт буоламмын, бу идэбин кэскиллээх уонна олоххо наадалаах дии саныыбын. Билиҥҥитэ үөрэхпин ситиһиилээхтик түмүктээн, магистратураҕа туттарсыахпын баҕарабын.

— Оттон иллэҥ кэмҥин хайдах атаараҕын?
— Бастакы куурустан университетым устудьуоннарын идэлээх сойууһугар көхтөөхтүк кыттабын. Кэнсиэрдэри иилээн-саҕалаан ыытабын, үҥкүүлүүбүн, ыллыыбын уонна айылҕаҕа сынньанарбын ордоробун.

Сэһэргээччибит куонкуруска кыайыылаах үрдүк аатын таһынан, куоластааһын түмүгүнэн “Мисс Интернет” диэн биир улахан номинацияҕа тигистэ. Барыга бастыҥ Саргыланаҕа олоҕун тухары кыайыы, үөрүү эрэ эҥэрдэһэригэр, былааннаабыта туолан иһэригэр баҕарабыт!

Айтана Аммосова, «Саха сирэ» хаһыат, edersaas.ru

Хаартыскалар — Интэриниэттэн.

0
0

Сайт матырыйаалларын ааптар көҥүлэ суох ылар бобуллар.

Ваш адрес email не будет опубликован.

три × 3 =