САРГЫЛААНА НОЕВА – В.Н. ПРОТОДЬЯКОНОВ КЭРИЭҺИГЭР УУС-УРАН ЛИТЕРАТУРА КИРИИТИКЭТИГЭР КҮРЭС КЫАЙЫЫЛААҔА

Тохсунньу  28 күнүгэр «Чолбон» сурунаал эрэдээксийэтэ 2021 сыллаахха ыытыллыбыт саха уус-уран литературатын кириитигэ уонна историга, ХИФУ доцена, РФ норуотун үрдүк профессиональнай үөрэхтээһинин бочуоттаах үлэһитэ, П.А. Ойуунускай аатынан СӨ Государственнай бириэмийэтин лауреата, Таатта улууһун бочуоттаах олохтооҕо Василий Никитич Протодьяконов кэриэһигэр уус-уран литература кириитикэтин сабыылаах күрэһин түмүктээтэ.

Санатар буоллахха, сабыылаах күрэскэ барыта 22 ааптар 26 үлэ Саха сирин араас муннуктарыттан, ол иһигэр Өлүөхүмэттэн, Сунтаартан, Бүлүүттэн, Кэбээйиттэн, Тааттаттан, Чурапчыттан киирбиттэрэ. Күрэс түмүгэ Саҥа дьыл иннинэ тахсыбыта. Дьүүллүүр сүбэ сүрдээх уһун, уустук үлэтин кэннэ, бастыҥнар ааттара биллибитэ.

Торум быһыытынан сабыылаах күрэһи түмүктүүр тэрээһин тохсунньуга киэҥник буолуохтааҕа. Ол эрээри, билиҥҥи уустук туругунан тэрээһин киэҥник ыытыллыбата, онон күрэс партнердара, Василий Никитич аймахтара уонна сорох кыайыылаахтар сатаан кыттыбатылар. Ол да буоллар кэлбит кыайыылаахтар «Чолбон» сурунаал бас эрэдээктэрэ Гаврил Андросов илиититтэн сыаналаах бириистэри туттулар уонна эрэдээксийэ үлэһиттэрин ирэ-хоро кэпсэтэн инники үлэни торумнаатылар.

Гран-при үрдүк аатын Саргылаана Ноева (Дьокуускай) ылан Таатта улууһун Октябрьскай нэһилиэгэ олохтообут убаһа бирииһинэн уонна Протодьяконовтар аймах оҥотторбут анал мэтээллэринэн наҕараадаланна.

1 м. Ольга Макарова (Таатта), 2 м. Ефросиния Иванова (Бүлүү), 3 м. Яков Алексеев (ХИФУ) буоллулар уонна 30, 15, 10 тыһыынча сууммалаах DNS сыыппаралаах уонна олоххо-дьаһахха туттуллар техника маҕаһыынын сертификаттарынан бэлиэтэннилэр. «Кэскиллээх кириитик» диэн анал ааты ылбыт М.К. Аммосов аатынан ХИФУ магистрана Татьяна Андросова «Айар» кинигэ маҕаһыынын биэс тыһыынча сууммалаах сертификатынан бэлиэттэннэ.

Быйылгы күрэс кыттааччыларын таһыма үрдүгүнэн, дьүүллүүр сүбэ кыайыылаахтары сэргэ өссө биэс киһини бэлиэтээтэ уонна кинилэр үлэлэрин сурунаалга бэчээттииргэ мэктиэлээтэ. Онон Егор Винокуров, Олимпиада Давыдова, Галина Неустроева, Сайаана Попова уонна Аркадий Самсонов үлэлэрэ «Чолбон» сурунаал быйылгы нүөмэрдэригэр тахсыахтара уонна эрэдээксийэттэн бэлиэ суруктары тутуохтара. Атын кыттааччыларга туоһу суругу электроннай аадырыстарыгар ыыталыахпыт.
«Чолбон» сурунаал эрэдээксийэтэ В.Н. Протодьяконов кэриэһигэр уус-уран литература кириитикэтин сабыылаах күрэһин тэрийиигэ өйөбүл буолбут «Саха сирин суруйааччыта» ассоциация бэрэссэдээтэлэ Олег Сидоровка, Таатта улууһун «Октябрьскай нэһилиэк» муниципальнай тэриллии баһылыга Андрей Семеновка уонна Протодьяконовтар аймахха, чуолаан СӨ норуотун хаһаайыстыбатын үтүөлээх үлэһитэ Михаил Протодьяконовка, улахан махталын биллэрэр.

Утум Захаров