Уопсастыба

Саргылаана Неустроева: “Өксөкүлээх Өлөксөй сыллара биллэриллибитэ саха норуотугар суолтата улахан”

Ил Дархан Айсен Николаев 2023-2027 сыллары Алексей Кулаковскай-Өксөкүлээх Өлөксөй сылларынан биллэрдэ. “Өксөкүлээх эргимтэтэ” уопсастыбаннай түмсүү салайааччыта Саргылаана Неустроева бэлиэтииринэн, бу саха норуотугар улахан суолталаах ыйаах.

– Ил Дархаммыт Өксөкүлээх Өлөксөй сылларын биллэрбитин биир бэйэм олус долгуйа иһиттим. Бэҕэһээ өрөспүүбүлүкэбит эрэ иһигэр буолбакка, Арассыыйа атын эрэгийиэннэригэр, тас дойдуларга олорор биир дойдулаахтарбыт истэннэр үөрүүлэрин биллэрдилэр. Бастакы Бэрэсидьиэммит Михаил Николаев “Өксөкүлээх Өлөксөй – Саха сирин духуобунай лидерэ” симпозиумҥа кинини саха норуотун уобараһа диэн эппитинии, Алексей Елисеевич биһиги күөн туттар киһибит. Ол иһин кыра оҕотуттан саҕалаан эдэригэр-эмэнигэр тиийэ кини үлэтин үөрэтэрбит сөп. Бу биэс сыл устата улахан үлэ былааннаныаҕа. Биһиги түмсүүбүт 19-20 үйэ чулуу дьонун музейын оҥорорго уонна Өксөкүлээх Өлөксөй Чурапчыга, Үөһээ Бүлүүгэ, Өймөкөөҥҥө туруорбут сэргэлэригэр сүгүрүйүүгэ бырайыагы олоххо киллэрэргэ этии киллэрдибит, – диэн бэлиэтиир Саргылаана Александровна.

Санатан эттэххэ, ыам ыйын 26 күнүгэр Хаҥалас улууһугар Хачыкаат нэһилиэгэр Алексей Кулаковскай төрөөбүтэ 145 уонна “Интеллигенцияҕа суругун” суруйан хаалларбыта 110 сылларыгар анаммыт “Өксөкүлээх Өлөксөй – Саха сирин духуобунай лидерэ” симпозиум буолан ааста. Барыта түөрт хайысханан үлэ ыытылынна. Саргылаана Неустроева “Алексей Кулаковскай култуураҕа, духуобунаска нэһилиэстибэтэ” секция үлэтин туһунан кэпсиир.

– Биһиги секциябытыгар уопсайа 22 дакылааты иһиттибит. Оскуолаҕа оҕону иитииттэн саҕалаан тыа сиригэр дьон-сэргэ бэйэтин хайдах дьаһанан олоруохтааҕар, аан дойду таһымыгар үлэлээһиҥҥэ тиийэ дакылааттар бааллар. Бу дакылааттар бары биир эрэ сыллаах үлэлэр буолбатахтар. Этэргэ диэри, кыттааччылар олохторун тухары анаарбыт, чинчийэн көрбүт үлэлэрин түмүгүн иһитиннэрдилэр. Холобур, Светлана Антонова Өксөкүлээх Өлөксөй “Саха интеллигенциятыгар” суругар олоҕуран, билиҥҥи судаарыстыбаннай атыылаһыы тэҥнэбилин оҥорбут. Бу үлэни эдэр баһылыктар ыйынньык курдук туттуохтарын сөп. Дьохсоҕон орто оскуолата федеральнай граҥҥа кыттан, бэс ыйын 8 күнүгэр Өксөкүлээх Өлөксөй “Сайын кэлиитэ” поэматынан сайыны көрсүү сиэрин-туомун оҥороору сылдьаллар. Ити курдук хас биирдии дакылаат олус интэриэһинэй, – диэн бэлиэтиир кини.

Аграфена КУЗЬМИНА, «Саха сирэ» хаһыат 

0
0
Telegram @edersaas20