Таатта Ытык Күөлүгэр Саргылаана Матвеева диэн урукку харыйа оонньуурдарын мунньар коллекционер олорор.
Кини идэтинэн инженер-технолог. Кэргэнинээн Михаил Николаевич Матвеевтыын бииргэ Тааттатааҕы ОДьКХ тэрилтэтигэр үлэлииллэр. Саргылаана каадыр салаатыгар ону сэргэ, уһун сыллар усталара профком бэрэссэдээтэлинэн үлэлээбит. Билигин бэһис сылын тэрилтэтигэр водозаборга диспиэччэринэн үлэлиир.
Саргылааналыын кэпсэтиибин билиһиннэрэбин:
— Мин дьон-сэргэ олоҕор быһаччы суолталаах тэрилтэҕэ үлэлиирбинэн киэн туттабын. Иллэҥ кэммэр иистэнэбин, эбээлэр «Айылҕаана» диэн түмсүүлээхпит. Онно көхтөөх кыттыыны ылабын уонна коллекционердар бөлөхтөрүгэр баарбын. Оҕо эрдэхпиттэн кэмпиэт суутун, буоста мааркаларын, артыыстар хаартыскаларын, значоктары уонна харыйа оонньуурдарын мунньабын. Мин харыйабар оонньуурдарым сороҕун эрэ иилэбин, тоҕо диэтэххэ үгүс оонньуурдар эбээлэрбит, аймахтарбыт бэлэхтэрэ, дэҥҥэ көстөр ретро-оонньуурдар буоланнар, харыстыыбын.
Түгэнинэн туһанан, ОДьКХ бары үлэһиттэрин 60 сыллаах үбүлүөйдэринэн эҕэрдэлиибин. Биһиги дьиэ кэргэн Саҥа дьылга хайаан да олохтоох тыйаатырга сылдьан сэргэхсийэрбитин, эт астан араас бүлүүдэлэри астаан бар дьоммутун үөрдэрбитин сөбүлүүбүт.
Оттон кэллиэксийэм туһунан этэр буоллахха, киһи тугу эрэ мунньар, сэҥээрэр буоллаҕына, олоххо көхтөөх уонна баҕалаах буолар эбит. Миэхэ билигин 1940 сыллаах өстүөкүлэ оҕуруо баар, ону сэргэ, 1950 сыллаах кумааҕыттан, хортуонтан, баататтан оҥоһуллубут сэдэх оонньуурдар бааллар. 1980 сыллаах таас оонньуурдар балачча бааллар. Хараҥаҕа фосфордарын уота тыгар оонньуурдар эмиэ кэллиэксийэбин хаҥаталлар. Маннык арааһы мунньар дьон улууспутугар элбэхтэр. Саргылаах саҥа сылынан!
Ульяна ЗАХАРОВА, edersaas.ru