Уопсастыба

“Саргыбыт сайыннын, дойдубут тубустун!”

«Саха төрүт култууратын кыһата». Чурапчылар норуот тутуутун көҕүлээтилэр!

“Айыы ситимин олохтуур ыччаттарбытын үтүөҕэ, сырдыкка уһуйар Киин тутуллара наадатын өйдөөн, бүттүүн өйбүтүн — санаабытын түмэн, сомоҕолоһон, кэлэр кэнчээри ыччакка хаалар үйэлээх норуот тутуута — «Саха төрүт култууратын кыһата» үлэҕэ киирэригэр бука бары кыттыһыаҕыҥ!”, — диэн Чурапчы нэһилиэгин Ытык сүбэтин  ыҥырыытын нэһилиэнньэ өйөөн, Чурапчы нэһилиэгин баһылыга Степан Саргыдаев көҕүлээһининэн, муус устар 9 күнүгэр Дьокуускайга “Сэргэлээх уоттара”  Култуура киинигэр өйөбүл акция ыытылынна.  

Татьяна Маркова, «Саха сирэ» хаһыат, https://edersaas.ru/

Бу күн Чурапчы талба талааннаахтарын быыстапкатынан саҕаланна. Фойеҕа тардыллыбыт экспозициялары сэҥээрэ сылдьан, Чурапчы сэлиэнньэтин олохтооҕо, норуот маастара, үлэ бэтэрээнэ Павел Алексеевич Варламовы көрсөбүн. Кини былыргы технологиянан оҥоһуллубут, хатырык уутугар оргутуллубут, арыынан иҥэриллибит иһиттэрэ – чороонноро, кытыйалара, хамыйахтара, маллаах иһиттэрэ – көрүөхтэн кэрэлэр, киһи болҕомтотун тута тардаллар.

Норуот маастара Павел Варламов.

—Уһаммытым 40 сыл буолла. Чурапчытааҕы олох-дьаһах комбинатыгар сувенирдары оҥорор сыахха өр үлэлээбитим, хас чороону оҥорбутум буолла, аахпаппын ээ, тыһыынчанан буолуо… Бу акцияҕа кыттан, быыстапкалыы турабыт. Уолаттарым бары уһаналлар, сиэннэр да үөрэниэхтэрэ дии саныыбын.

Сэлиэнньэбитигэр Итэҕэл дьиэтэ тутулуннаҕына, ыччаты уһуйарга аналлаах Уус кыһата баар буолуо этэ диэн, ону туруорсабыт уонна эрэнэбит, биһиги маастардар, —диир Павел Алексеевич.

Акция саҕаланыытыгар Чурапчы нэһилиэгин баһылыга Степан Саргыдаев, нэһилиэк дьокутааттарын Мунньаҕын бэрэссэдээтэлэ Евгений Попов, улуус Бэтэрээннэрин сүбэтин бэрэссэдээтэлэ Матрена Николаевна Матвеева, үлэ, тыыл бэтэрээнэ, сэрии сылларыгар Чурапчы холкуостарын хоту күүс өттүнэн көһөрүү кыттыылааҕа, ССРС култууратын туйгуна, худуоһунньук, скульптор, Чурапчы улууһун бочуоттаах гражданина Василий Николаевич Дьячковскай бар дьону, биир дойдулаахтарын, Арчы дьиэтин иккис уочаратын – «Саха төрүт култууратын кыһата» норуот тутуутугар бары биир киһи курдук тэрээһиннээхтик, көхтөөхтүк кытталларыгар ыҥырдылар.

Ытык киһи Василий Николаевич Дьячковскай мустубут дьоҥҥо, ыччаттарга үтүө холобуру көрдөрөн, норуот тутуутугар анаан нэһилиэк бэтэрээннэрин кэмбиэрдээх сэмэй кылааттарын аан бастакынан киллэрдэ.

Биир дойдулаахтар.

Дьэ ол кэнниттэн сценаҕа тэрилтэлэр салайааччылара, патриоттуу санаалаах эдэр дьон, Чурапчы орто оскуолатын бүтэрбиттэр,  дьиэ кэргэттэр, аймахтар, бэтэрээннэр, “Далбар Хотун”, “Алаас кыргыттара” түмсүүлэр, ыччаттар тахсыталаан, сэмэй кылааттарын “уопсай хочуолга” уктулар. Оттон биир дойдулаахпыт Алексей Пинигин (“Якутские тепловые сети”) 100000 солкуобайдаах сертификат туттарда.

“Отонноотоххо — оҥоойук туолар”. Бу өйөбүл акция-кэнсиэр  кэмигэр,  счетнай хамыыһыйа биллэрбитинэн, норуот тутуутугар анаан уопсайа 400-чэкэ тыһыынча солкуобай киирдэ!

Ити курдук, бу киэһэ киэргэлинэн Тоҕус томтордоох Чурапчы нэһилиэгин “Алгыс” бэтэрээннэр хордара буолла. Байааҥҥа доҕуһуоллаата, 40-ча сыл тыа кулуубугар айымньылаахтык үлэлээбит  СӨ култууратын туйгуна Спиридон Готовцев.

«Алгыс» бэтэрээннэр хордара. Байааҥҥа доҕуһуоллуур С.Г.Готовцев.

Өрөспүүбүлүкэ, улуус, нэһилиэк киэн туттар ырыаһыттара, РСФСР култууратын үтүөлээх үлэһитэ, чабырҕахсыт Мария Герасимова-Сэҥээрэ  уонна эстрада чаҕылхай артыыстара Далаана, Анастасия Готовцева, Валентина Романова — Чыскыырай, Намыына, Сахамин, “Айархаан” бөлөх, “Гармония” ырыа ансаамбыла, “Тэтим” оҕо үҥкүү ансаамбыла, о.д.а. ырыа – тойук, үҥкүү түһүлгэтин төрүттээтилэр.  Дьоро киэһэни Николь уонна Николай Гоголев иилээн саҕалаан ыыттылар. «Саха төрүт култууратын кыһата» — норуот тутуутун өйүүр акция салҕанар.

Татьяна Маркова, «Саха сирэ» хаһыат, https://edersaas.ru

Петр Оконешников хаартыскаҕа түһэриилэрэ.

Кыттыс, дойдуҥ, дьонуҥ туһугар, Саха төрүт култууратын кыһата олоххо киирэригэр бэйэҥ сэмэй кылааккын киллэр!

Реквизит:

УФК по РС(Я) (Администрация МО Чурапчинский наслег Чурапчинского улуса (района) РС (Я)

ИНН     1430008469

КПП      143001001

ОКТМО  98658470

л/с  04163209000

р/с  40101810100000010002

БИК  049805001

4
2
Telegram @edersaas20

“Саргыбыт сайыннын, дойдубут тубустун!”

  1. Чурапчылар дьэ кыайа тутар, улэьит дьон. Мнн 80-с сыллардаахха олорбутум, улэлээбитим. Манчаары ыьыа5ар бара сылдьан сехпутум, дьыл- хонук аастар , кэм уларыйдар да, темпэлэрин олох ыьыктыбакка, тумсуулээхтик салайынан олороллорун. Утуе дьон бачыыма олоххо киириэ. Ситиьиилэри ба5арабын!

  2. Чурапчылар тустарынан учугэй статьялары сэргээн аа5абын, мин тереппутэрим Чурапчыга уерэнэ сылдьан билсэннэр ыал буолбуттар, миигин тереппуттэр. Наар дьонун- сэргэтин хайгыыллар, мин Чурапчыны уже таптыыбын, Чурапчыларга ситиьиилэри ба5арабын, мин эьиэхэ олоро, улэлии тиийиэм!

  3. Чурапчым сайдарын туьугар кемелеьуеххэ сеп бе5е буолла5а, буолар — буолбат дьаьалларга уп бе5етун ороскуоттуубут. Учууталым Степан Анатольевич,салайар улэ5эр ситиьиилэри ба5арабын!Дьон санаата кэллин, ейдуу-ейуу турдун!

Добавить комментарий