Сардаана Трофимованы суруналыыстар бастыҥынан таллылар

Ааптар: 
Бөлөххө киир:

Чэпчэки атлетикаҕа РФ спордун норуоттар икки ардыларынааҕы кылаастаах маастара Сардаана Трофимованы биһиги, төһө даҕаны Олимпиадаҕа кыттыбатаҕын үрдүнэн, син биир олимпиец курдук сыаналыыбыт.

Ол курдук, Сардаана марафоҥҥа Россия кубогар кыайыылааҕынан тахсан баран, аны Екатеринбург куоракка ыытыллыбыт “Европа-Азия” диэн улахан таһымнаах норуоттар икки ардыларынааҕы турнирга бастакы миэстэҕэ тахсан, Риоҕа кыттыахтаах Россия хамаандатын састаабыгар киллэриллибитэ. Хомойуох иһин, арҕааҥҥы дойдулар туруорсууларынан, Россия чэпчэки атлетикаҕа хамаандата Риотааҕы оонньууларга киллэриллибэтэҕинэн, Сардаанабыт Олимпиадаҕа кыттыбакка хаалла. Ол эрээри кини санаата бөҕөх, син биир туруоруммут соругун ситиһэн, 2020 с. Токиоҕа буолуохтаах Олимпийскай оонньууларга сыалланан-соруктанан бэлэмнэнэ сылдьар.

Сыл түмүгүнэн, Сардаана Трофимоваҕа анаан өрөспүүбүлүкэ спортивнай суруналыыстара бэйэлэрин анал бириистэрин анаатылар уонна ону Пресса баалыгар үөрүүлээх быһыыга-майгыга туттардылар.


— Сардаанаҕа туох эмэ анал бэлиэ  туттарыахха наада диэн, Чөмпүйүөннэр баалларын иннинэ спортивнай суруналыыстар кэпсэппиппит, — диир, бу дьаһалы көҕүлээбит спорт национальнай киинин отделын начаалынньыга, суруналыыс Владислав Коротов. — Онтон тугу биэрэбит диэн сүбэлэһии түмүгэр, анал статуэтка ордук буолуо диэн быһаарбыппыт. Оҥорор маастары мин көрдөөбүтүм. Билэр скульпторым Николай Чоччасов сүбэтинэн, Бэрдьигэстээххэ олорор Александр Алексеев диэн уолу кытта кэпсэппитим. Киниэхэ Сардаана хаартыскатын, видеотын ыыппытым. Чөмпүйүөннэр бааллара буолуо икки эрэ күн баара. Александры ыксатан, түүннэри үлэлэппиппит. Аныгы технология көмөтүнэн, үйэбэр көрбөтөх киһибэр итинник эппиэттээх сорудаҕы оҥорторбуппут баҕабыт хоту буолбутуттан астынныбыт. Сардаана сборга сылдьар буолан, Баалга кэлбэтэҕэ, онон «Билинии» диэн ааттаабыт бирииспитин Бэчээт күнүгэр туттарарга быһаарбыппыт. Бээтинсэҕэ онтубутун толордубут, Сардаана олус үөрэн барыбыт сүргэтин көтөхтө.
Дьэ ити курдук, спортивнай суруналыыстар аны мантан инньэ итинник «Билинии” бирииһи сылын аайы туттарарга сүбэлэстилэр.

Петр ПАВЛОВ.

+1
0
+1
0
+1
0
+1
0
+1
0
+1
0
+1
0