Сүүрүүк Сардаана Трофимова бу сайын Бороҕоҥҥо ыытыллыбыт Саха сирин норуоттарын спортивнай оонньууларын кэмигэр Киргизия аатыттан күрэхтэһиэхпин баҕарабын, онно гражданство ыларга докумуон ситиһэ сылдьабын диэн иһитиннэрэн турардаах.
Сардаана Трофимова Киргизия сүүмэрдэммит хамаандатын аатыттан күрэхтэһиилэргэ кыттарын Арассыыйа чэпчэки атлетикаҕа федерацията (ВФЛА) бигэргэттэ. Ол туһунан федерация бэрэсидьиэнэ Ирина Привалова ТАСС-ка иһитиннэрдэ: «Президиум бүтэһик мунньаҕар Сардаана Трофимова Киргизия сүүмэрдэммит хамаандатыгар көһүүтүн бигэргэттэ».
Аан дойдуга бүрүүкээбит допинг айдаанынан Олимпиадаларга Арассыыйа уон атлета эрэ кыттар бырааптаах, ону даҕаны нейтральнай статустаах буоллахтарына. Онтон Украинаны кытта балаһыанньа уустугуран, Арассыыйа уонна Белоруссия атлеттара дойду таһынааҕы күрэхтэһиилэргэ кытталларын чэпчэки атлетика норуоттар икки ардыларынааҕы федерацията боппута.