Марафоҥҥа Арассыыйа түөрт төгүллээх чөмпүйүөнэ Сардаана Трофимова Сочитааҕы кыайыытын кэнниттэн бүгүн Саха сиригэр көтөн кэллэ. Кинини Дьокуускай аэропуордугар СӨ Успуорка уонна физическэй култуураҕа министиэристибэ, спортивнай бэлэмнээх буолуу киинин салалталара, биир дойдулаахтара уонна чугас дьоно көрүстүлэр.
«Ааспыт марафоҥҥа табыллан сүүрдүм. Трасса даҕаны, күн-дьыл даҕаны үчүгэй көрдөрүү кэлэригэр көмөлөстүлэр диэххэ сөп. Ол эрээри, үгүс спортсмен чаһытыгар трасса дистанцията арыый уһуну көрдөрбүтэ. Онон, өссө үчүгэй көрдөрүүлэниэхпин сөп этэ. Тириэньэрим туруорбут соругун толордум. Бастатан туран, олимпийскай нуорманы ситиһиэхтээх этим, итиэннэ дойду чөмпүйүөнүн титулун көмүскүөхтээх этим. Дойду үрдүнэн бастыҥ көрдөрүүлэнним», — диэн Сардаана санаатын эттэ.
Маны сэргэ Сардаана марафоҥҥа сүүрэрин устата тырыбыналартан кинини өйөөбүттэрин, ол кинини өссө кынаттаабытын туһунан эттэ. Бэлиэтээн суруйдахха, Сардаана бу ааспыт үс ый иһигэр икки улахан марафоҥҥа сүүрэн бастаата — Москватааҕы марафоҥҥа уонна Арассыыйа чөмпүйэнээтигэр.
«Сыл бастакы аҥаарыгар биир даҕаны күрэхтэһии ыытыллыбатаҕа, оттон бу аҕыйах ый иһигэр иккитэ күрэхтэстим. Бу маннык миэхэ бастакытын буолла. Тириэньэрбинээн табыгастык үлэлээн, сезону бэрткэ аастыбыт. Билигин дьиэбэр сынньана түһүөм. Манна таһырдьа тымныы, оттон мин дьарыктаныахпын, сүүрүөхпүн наада. Онон ахсынньы бүтүүтэ дьарыктана барабын. Саҥа дьылы Москваҕа көрсөбүн. Өссө туох күрэхтэһиигэ кыттарым билиҥҥитэ биллибэт, кэлэр сыл муус устарыгар Сочига дойду чөмпүйэнээтэ буолуохтаах», — диэн Сардаана былааннарын кэпсиир.
edersaas.ru
Хаартыскалар — Мария Васильева, СИА