Сардаана Трофимова биир дойдулаахтарын эрэллэрин түһэн биэрбэтэ
Үөһээ Бүлүүгэ ыытыллар спорт национальнай көрүҥнэригэр ХХ-с Манчаары оонньууларын иккис күнүн биир кэрэхсэбиллээх түгэнинэн, биэс биэрэстэҕэ Арассыыйа икки чөмпүйүөнэ, Саха сирин олимпийскай эрэллэрэ Наталья Леонтьева уонна Сардаана Трофимова күрэстэһиилэрэ буолла.
Сырсыыны хара ааныттан биир дойдулаахтарын тэптэрэн биэрэр хаһыыларынан доҕуһуоллатан Сардаана баһылаан-көһүлээн барар. Суол аҥаарыгар Сардааналаах Наталья ылбыт тэтимнэрин тулуйбакка, сырсааччылара кинилэртэн улам хааллар-хаалан бараллар. Арассыыйа чөмпүйүөннэрэ иккиэйэҕин эрэ тутуһа сылдьаллар. Хайа эрэ кэмҥэ Наталья инники тахсар. Ол эрээри Сардаана сүрүн утарылаһааччытын ситэн ылан, тэтимин эптэр-эбэн, аны, Натальяттан аттар-атан барар. Уонна көрөөччүлэр «Сардаана! Сардаана!» хаһыыларынан доҕуһуоллатан биэтэккэ бастакынан кэлэр.
Манна Сардаана Трофимова марафоҥҥа идэтийэр уһун тыыннаах сүүрүк, оттон Наталья Леонтьева орто дистанцияларга күрэстэһэр быһый буоларын санатар тоҕоостоох. Наталья быйыл Москваҕа ыытыллыбыт Арассыыйа кыһыҥҥы чөмпүйэнээтигэр биэс биэрэстэҕэ 15 мүнүүтэ 51 сөкүүндэни көрдөрөн бастаан турар.
Быһыйдар сарсын аны үс биэрэстэҕэ күүстэрин холоһуохтара.
Сүүрүү кэнниттэн суруналыыстарга биэрбит кылгас интервьютугар Сардаана биир дойдулаахтарыгар өйөбүллэрин иһин махтанна, кинилэр тэптэрэр хаһыылара күүһүгэр күүс эбэрин эттэ. Инники былааннарын туһунан ыйытыыга, билигин норуоттар икки ардыларынааҕы күрэхтэһиилэргэ тус бэйэм ааппыттан кыттарга тириэньэрбинээн Татьяна Жирковалыын сайаапка түһэрбиппит, билигин онно хоруй күүтэбит диэн хардарда.
Роман ПОПОВ, «Саха сирэ» хаһыат, edersaas.ru