Сочитааҕы Арассыыйа чөмпүйэнээтигэр Сардаана Трофимова олимпийскай нормативы толордо. Сардаана нуорманы толоруу кини сүрүн сыала буоларын эттэ.
«Мин бу сүүрүүгэ олимпийскай нормативы толорор санаалааҕым. Тоҕо диэтэххэ, Москватааҕы марафоҥҥа мин көрдөрүүбүн аахпатахтара. Мин нуорманы толорорбун билэр этим, ол иһин көрдөрүүбүн эбии тупсарар баҕалааҕым», — диэн Сардаана кыайыы кэнниттэн этэр.
Сардаана GPS трассаны арыый уһун диэн көрдөрбүтүн иһин, тус тириэньэрэ Татьяна Жиркова эппит тэтимиттэн арыый түргэнник сүүрбүтүн бэлиэтиир.
«Мин тириэньэрбэр итэҕэйэбин, сүрүн соругум — кини сорудаҕын толоруу. Бүгүн күн-дьыл туран биэрдэ, сүүрэр суолум — көнө. Ыалдьааччылар бааллара миэхэ күүс-сэниэ биэрдэ. Тырыбыналарга ыалдьааччылартан ураты миигин трассаҕа өйөөччүлэр эмиэ үгүс этилэр. Ситэн аастаҕым аайы өйөбүл тыллары истибитим», — диэн марафоҥҥа Арассыыйа түөрт төгүллээх чөмпүүйөнэ буолбут Сардаана Трофимова иһитиннэрдэ.
edersaas.ru