Сардаана Саввина уонна Семен Шишигин Барнаулга «Бастыҥ продюсер» аатын сүктүлэр

Балаҕан ыйын 5 күнүгэр Барнаулга Шукшин аатынан Бүтүн Арассыыйатааҕы киинэ ХХІІ бэстибээлэ түмүктэннэ.

Бэстибээлгэ кыттыбыт Дмитрий Давыдов «Ийэкээм» киинэтэ «Бастыҥ продюсерскай үлэ» номинацияҕа кыайан, продюсердар Сардаана Саввина уонна Семен Шишигин туйгун үлэлэрэ бэлиэтэннэ. Киинэни, уопсайынан, көрөөччүлэр олус биһирээтилэр, истиҥник көрүстүлэр диэн Саха сирин култууратын пресс-киинэ иһитиннэрэр.

Киинэ тыйаатырдара пандемиянан сибээстээн сабыллан турар буоланнар, бэстибээлгэ кыттар киинэлэр аһаҕас халлаан анныгар, Барнаул куорат үс болуоссатыгар көрдөрүлүннүлэр. Аҕыс күрэскэ кыттыбыт киинэлэри көрөөччүлэр сороҕор тыаллаах, сороҕор ардахтаах тымныы күннэртэн толлубакка, бэрткэ сэргээн көрдүлэр. Саха сириттэн аҕалыллыбыт киинэни көрө кэлбит киһи төһө да аҕыйаҕын иһин, сеанс бүтүөр диэри ким да барбакка, балай да уһун хартыынаны сэргээн көрбүттэр.

Саха сиригэр продюсер үлэтэ кэнники кэмҥэ кыралаан да буоллар сайдан иһэр. Сардаана Саввина өр сыллар усталарыгар Саха сиригэр уһуллубут киинэлэри Арассыыйа, тас дойдулар улахан бэстибээллэригэр тиэрдэн, дойдубут киинэтин аатырдарга сыаната быһыллыбат улахан өҥөнү оҥорбут киһи. Семен Шишигин, киинэ эйгэтигэр аҕыйах сыллааҕыта кэлбитэ эрээри, хас даҕаны бэлиэ үлэни үбүлээн, аатын ааттаппыт киһи. Өссө даҕаны саҥа продюсердар көстөн, саҥа киинэлэри көрөөччүлэргэ тиэрдэн иһиэхтэрэ диэн эрэл санаа баар.

Хаартыска https://www.amic.ru