Сардаана Гурьева Киһи быраабын көмүскүүр боломуочуйаны сүктэ

Бөлөххө киир:

Сардаана Гурьева Гражданскай уопсастыба институтун сайдыытын миниистиринэн үлэлээн бүтэн, Киһи быраабын боломуочуйалааҕа буолла. Бүгүн Ил Түмэн дьокутааттара Ил Дархан киллэрбит кандидатуратын өйөөтүлэр.

Сардаана Михайловна 2016 с. Гражданскай уопсастыба институтун сайдыытын миниистиринэн анаммыта. Бу министиэристибэ былырыын Уопсастыбаннай көҕүлээһин департаменын оннугар тэриллибитэ.
Мунньах кэмигэр норуот дьокутааттара кэлиҥҥи сылларга Киһи быраабын боломуочуйалааҕар үгүс киһи көрдөһүүлээх кэлэрин, саастарын ситэ илик оҕолорго, хотугу аҕыйах ахсааннаах норуоттар кыһалҕаларыгар болҕомто ууруохха наадатын, Саха сирин олохтоохторун интэриэһин көмүскүүргэ, бастатан туран, Төрүт Сокуоҥҥа олоҕуруохха наадатын бэлиэтээтилэр. Уонна боростуой дьоҥҥо туох да бюрократията суох чугас буоларга эттилэр.
Сардаана Михайловна үөрэх, доруобуйа харыстабылыгар, социальнай эйгэҕэ киһи быраабын көмүскээһин федеральнай таһымҥа барыахтааҕын иһитиннэрдэ.

Ыспыраапка:

Гурьева Сардаана Михайловна 1971 с. ыам ыйын 17 күнүгэр Мэҥэ Хаҥалас улууһугар Майа сэлиэнньэтигэр төрөөбүтэ. 1996 с. СГУ историческай-юридическай факультетын үөрэнэн бүтэрбитэ. Кэлин Россиятааҕы судаарыстыбаннай сулууспа академиятыгар үөрэммитэ.
1996 с. үөрэҕин бүтэрээт, Ил Түмэҥҥэ кылаабынай исписэлииһинэн, старшай референынан үлэлээбитэ. 2001 с. Үлэ судаарыстыбаннай инспекциятын салайааччытын солбуйааччынан, 2005 с. Быраап боппуруостарыгар федеральнай уорганнары кытары үлэлэһэр департамент салайааччытын солбуйааччынан, 2007 с. бу департамент салайааччытынан анаммыта. 2012 сылтан Юстиция судаарыстыбаннай кэмитиэтин салайан кэлбитэ. 2016 с. Гражданскай уопсастыба институтун сайдыытын миниистиринэн үлэлээбитэ.

Аграфена КУЗЬМИНА, “Саха сирэ” хаһыат, edersaas.ru.

+1
0
+1
0
+1
0
+1
0
+1
0
+1
0
+1
0