Сардаана Авксентьева Дьокуускай куорат баһылыгын дуоһунаһыгар киирдэ
Балаҕан ыйын 17 күнүгэр куорат уокуруктааҕы дьаһалтатыгар Дьокуускай баһылыгын дуоһунаһыгар Сардаана Авксентьева киириитин сиэрэ-туома буолла. Үөрүүлээх тэрээһин Дьокуускайга ааспыт куорат баһылыгын быыбарын түмүктэрин иһитиннэрииттэн саҕаланна. Сардаана Авксентьева быыбар иннинээҕи күрэстэһиигэ быыбардааччылар 39,09 быр. куоластарын ылан, кыайыыны ситистэ. Дьокуускай куорат куораттааҕы быыбардыыр хамыыһыйатын бэрэссэдээтэлэ Алла Самойлова Сардаана Владимировнаҕа куорат баһылыгын дастабырыанньатын туттарда.
Дуоһунаска дьиҥ таһымнаахтык үктэнэригэр куорат саҥа баһылыга Сардаана Авксентьева бирисээгэ биэрдэ “… киһи уонна гражданин быраабын уонна көҥүлүн, демократия уонна конституция тутулун, куорат интэриэһин көмүскүөм, куорат уокуругун баһылыгын эбээһинэһин үтүө суобастаахтык толоруом”.
СӨ Конституционнай суутун бэрэссэдээтэлэ Александр Ким-Кимэн, Дьокуускай куорат Дууматын бэрэссэдээтэлэ Альберт Семенов, үһүс уонна төрдүс ыҥырыылаах Ил Түмэн норуодунай дьокутаата Владимир Федоров, Дьокуускай куорат үрдүкү Ытык Сүбэтин чилиэнэ уонна СӨ норуотун хаһаайыстыбатын үтүөлээх үлэһиттэрэ эҕэрдэлээтилэр уонна баҕа санааларын тиэртилэр.
“Куораты салайыы – ол аата куорат бары эйгэлэргэ сайдыытын, куорат олохтоохторун олоҕо тупсаҕай буоларын туһугар эппиэтинэһи сүгүү. Тоҕо диэтэххэ, эрэнии эппиэтинэһи кытта ыкса сибээстээх. Бүгүн өрөспүүбүлүкэ нэһилиэнньэтин үс гыммыт биирэ олорор киин куораппытыгар уонна Саха сирин бүттүүнүгэр Арассыыйа бэрэсидьиэнэ Владимир Владимирович Путин “ыам ыйдааҕы” ыйааҕар этиллибит киэҥ хабааннаах соруктара тураллар. Биһиги Дьокуускайбыт дойду баһылыгын Уһук Илин сайыннарыыга көҕүлээһиннэрин олоххо киллэриигэ инники күөҥҥэ сылдьааччылартан биирдэстэрэ буолар. Мин историяҕа хааларга дьулуспаппын. Биһиги бэйэбит кыахпытын, билиибитин, бириэмэбитин уонна күүспүтүн төрөөбүт Сахабыт сирин ситиһиилээх сайдыытын, куорат олохтоохторун тупсаҕай олохторун кытта сибээстииргэ аныахпыт”, — диэн куорат баһылыга Сардаана Авксентьева.
Үөрүүлээх тэрээһиҥҥэ былаас уорганын бэрэстэбиитэллэрэ, дьокутааттар, биллэр уопсастыбанньыктар, ону тэҥэ култуура уонна спорт деятеллэрэ кытыннылар, диэн куорат дьаһалтатын сонуннары киэҥник тарҕатар сириэстибэлэри кытта бииргэ үлэлээһиҥҥэ департамена иһитиннэрдэ.
edersaas.ru