— Анал этиигэ оруобуна биһиги уруккуттан туруорсар, көрдөһөр соруктарбыт, этиилэрбит киирдилэр. Айсен Сергеевиһы кытары биһиги Дьокуускай куорат статуһун саҥардар сокуон туһунан кэпсэтэ сылдьыбыппыт, сокуон уонча сыллааҕыта ылыныллыбыта.
Онон куорат статуһун туһунан сокуону саҥардыыны биһиги бары биһирии иһиттибит. Иккиһинэн, Дьокуускай куорат социальнай-экэнэмиическэй сайдыытын туһунан ыйаахха тохтуом этэ. Ил Дархан сорудаҕынан премьер-миниистир Андрей Тарасенко салайааччылаах бырабыыталыстыба хамыыһыйата тэриллибитэ. Номнуо ый курдук бу хайысханан үлэлээн эрэбит. Анал этиигэ суол хаһаайыстыбатын сайыннарыыга элбэх былаан этилиннэ, ол иһигэр Дьокуускай куоракка суолу тутууну 48 км диэри улаатыннарыы.
Кэлэр сылтан суол хаһаайыстыбатыгар киэҥ далааһыннаах улахан үлэни ыытаары сылдьабыт. Ол курдук Ленин проспегын саҥардан оҥоруу саҕаланыахтаах. Уопсайа 1,5 миллиардаах үлэ ыытыллыахтаах. Онтон Залог, чуолаан “Старый город-2” тутуутун туһунан этэр буоллахха, 2016 сыллаахха куорат бу оройуонун историческай көстүүтүн саҥардыы туһунан кэнсиэпсийэ ылыныллыбыта. Ол гынан баран, бу оройуоҥҥа 77 сир учаастага, элбэх кыбартыыралаах 22 дьиэ баар. Онно баар 104 кыбартыыраттан 31-рэ эрэ муниципальнай бас билиигэ сылдьар. Маны таһынан, чааһынай дьиэлэр, элбэх административнай тутуулар бааллар. Онон историческай суолталаах эбийиэктэри тутууга сири ыраастыахха наада. Бу манна олорор дьоҥҥо харчынан боруостааһын оҥоһуллуохтаах. Инньэ гынан, бу үлэни ыытарга 1 миллиард солкуобай кэриҥэ үп наада. Бүгүн Айсен Сергеевич бу боппуруоһу туруоран, өрөспүүбүлүкэттэн көмө баар буолуоҕун эттэ.
edersaas.ru