Дьокуускай куорат төрөөбүт күнүгэр, балаҕан ыйын 13 күнүгэр, саҥа тутуллубут социальнай эбийиэктэр ааннарын тэлэччи арыйдылар. Үөрүүлээх аһыллыыга бырабыыталыстыба, куорат салалтатын үлэһиттэрэ кытталлар.
Төгүрүччү турар дьиэлэринэн сибэкки эминньэҕин санатар быһыылаах сабыс-саҥа 203-с түөлбэ килбэйэр киинигэр аныгылыы тупсаҕай, 315 миэстэлээх “Сардаана” уһуйаан тутуллан киирдэ. Уһуйааны судаарыстыбаннай-чааһынай партнерство бырагырааматынан “Газэнергомонтаж” ХЭТ (“ВИС” тэрилтэ салаата) тутан киллэрдэ. Оҕо саадыгар анаммыт дьиэ 2 этээстээх, 4644 кв.м. иэннээх, спортивнай, музыкальнай саалалардаах, оонньуур былаһааккалардаах, психолог, логопед, медик кэбиниэттэрэ бааллар.
Марианна Иванова, сэбиэдиссэй:
— Уһуйааммытыгар сахалыы, нууччалыы 18 бөлөхтөөхпүт. Уратыбыт диэн, “Демография” национальнай бырайыак чэрчитинэн, оҕону 1,5 сааһыттан ылабыт, дьааһыла бөлөҕө баар. Ону тэҥэ, үс тылынан: сахалыы, нууччалыы, английскайдыы эбии иитии-үөрэтии ыытыллар. 36 педагог, 12 эбии үөрэхтээһин исписэлииһэ үлэлиир.
Сардаана – сахаларга дьол, үөрүү бэлиэтэ, күндү сибэкки. Ол иһин уһуйааммытын оннук ааттаатыбыт. Билигин оҕолорбут медосмотры бара сылдьаллар, аҕыйах күнүнэн оҕо-аймах саҥата чуопчаарыа. Бу 203-с түөлбэ олохтоохторо олус табыллыбыттар дии саныыбын: дьиэлэрин аттыгар сабыс-саҥа уһуйааннар, оскуолалар тутулуннулар.
Оскуола иннинээҕи ФГОС чэрчитинэн, “Төрүөҕүттэн оскуолаҕа диэри” бырагырааманы үлэлэтэбит. Төрөөбүт тылы, Саха сирин норуоттарын төрүт үгэстэрин, култуураларын үөрэтэргэ “Кустук” бырагырааманы киллэрдибит.
Инновационнай хайысха быһыытынан, 4 саастарыттан “Полилингвальнай үөрэтии” диэн бырагыраама үлэлиэҕэ. Ол эбэтэр, тылы уруок курдук буолбакка, күннээҕи олоххо туттан, үөрэтиэхтэрэ. Холобур, биир иитээччи наар сахалыы саҥарар, иккис иитээччи – нууччалыы, үһүс иитээччи – английскайдыы. Сууналларыгар, аһыылларыгар, дьарыктаналларыгар, күнү быһа английскайдыы саҥараллар. Оччоҕо оҕо үс тылынан тэҥҥэ саҥарар буолар, булкуйбат. Оҕо уһуйааны бүтэрэригэр үс тылынан арааран, чопчутук саҥарар буоларын ситиһиэхтээхпит. Барыта төрөппүт баҕатынан. Биһиги урут бу ньыманы олоххо киллэрэ сылдьыбыппыт, өрөспүүбүлүкэҕэ да ньымабытын билиһиннэрбиппит, үчүгэй түмүктэр бааллар этэ.
Эдэр, эрчимнээх кэлэктиип маннык үчүгэй усулуобуйаҕа айымньылаахтык, үөрэ-көтө үлэлииргэ, саҥаны киллэрэргэ бэлэммит. Сабыс-саҥа, киэҥ-куоҥ, сырдык-сылаас дьиэҕэ киирэн, үөрүүбүт улахан. Тутааччыларга, өрөспүүбүлүкэ салалтатыгар махтанабыт. “Газэнергомонтаж” Дьокуускайга 12 социальнай эбийиэги туппут, улахан уопуттаах тэрилтэ. Онон туох баар ирдэбиллэри тутуһан туппуттар.
Ангелина Васильева, “Саха сирэ” хаһыат, edersaas.ru