Бэҕэһээ Арассыыйа тэбэр сүрэҕэр Москватааҕы марафон ыытылынна. Онно Үөһээ Бүлүү быһый кыыһа Сардаана Трофимова сырсааччыларын ырааҕынан быраҕаттаан кыахтаахтык бастаата уонна трасса рекордун икки мүнүүтэ курдугунан тупсарда.
Сэбиэскэй кэмҥэ ыытылла сылдьыбыт норуоттар икки ардыларынааҕы эйэ марафонун оннугар 2013 сылтан тэриллэр күрэхтэһиигэ быйыл отут тыһыынча кэриҥэ идэтийбит спортсмен уонна сүүрүүнү таптааччы, ол иһигэр 71 омук дойдутуттан икки тыһыынчаттан тахса сүүрүүк, кытынна.
Сыл сүрүн сабыытыйатынан ааттаммыт куоталаһыы тэрийээччилэрэ эрдэттэн, Москватааҕы марафону киэҥ билиигэ таһаарар туһуттан, эр дьон уонна дьахталлар трасса саҥа рекордун олохтуурга холонуохтарын иһитиннэрбиттэрэ.
Эр дьоҥҥо бастаабыт Артем Алексеев 42 биэрэстэ 195 миэтэрэ сири 2 чаас 14 мүнүүтэнэн кэллэ. Уфа марафонеһа былырыыҥҥы ситиһиитин хатылаата эрээри, бэйэтин рекордугар – 02.13.40 – бэрт кыранан тиийбэтэ.
Оттон Москватааҕы марафоҥҥа бастакытын кыттыбыт дойду 2015 сыллааҕы чөмпүйүөнэ, Арассыыйа Кубогын былырыыҥҥы хаһаайката, Үөһээ Бүлүү Тамалакааныттан төрүттээх Сардаана Трофимова 2 чаас 30 мүнүүтэ 29 сөкүүндэ көрдөрүүлэнэн, трасса рекордун икки мүнүүтэ курдугунан тупсарда. Кини иккис буолбут Мария Ковалеваны (Омскай, 02.37.48.) сэттэ мүнүүтэнэн куотта. Үһүс буолбут Авдокия Букина (Челябинскай) бириэмэтэ – 02.40.13.
Сардаана Трофимова тириэньэринээн Татьяна Жирковалыын бу чаҕылхай кыайыыларынан Саха сирин чэпчэки атлетикатын устуоруйатыгар өссө биир саҥа үрдэли ситистилэр.
Роман Попов, «Саха сирэ» хаһыат
Хаартыскалар интернеттэн ылылыннылар.