Саппааска 2 740 туонна оттонуоҕа

Ааптар: 
Бөлөххө киир:

Кураан уонна ойуур баһаардара төһө да уустуктары үөскэппиттэрин үрдүнэн, Бүлүү улууһун (баһылык Сергей Винокуров) туруу үлэһит дьоно бэйэлэрин сүөһүлэрин-сылгыларын кыстыыр отун хааччыммыттарын таһынан, саппаас пуондатыгар эмиэ оттуурга соруктанан үлэлии-хамсыы сылдьаллар.

 

Быйыл сатыылаабыт уот кураан Бүлүү улууһун тумнубата. Чуолаан куорат чугаһынааҕы нэһилиэктэр ходуһалара курааннаатылар. Холобур, “Ампаардаах” хаһаайыстыба былырыын 300 рулуоннаах оту ылбыт ходуһатыттан 70 эрэ рулуону ылла. Ол эрээри сүөһүлэрин кыстатарга тиийбэт оту улуус иһиттэн ханнык хаһаайыстыбаттан, хайдах ыларын быһаарынна. Оттон атын нэһилиэктэргэ үүнүү ортоһуор. Инньэ гынан, окко былааммытын 91 % толоруохпут диэн улуустааҕы тыа хаһаайыстыбатын департамена суоттанар.

Атырдьах ыйын 10 күнүнээҕи туругунан, улуус үрдүнэн 18 309 т от кэбиһилиннэ. Итинэн былааннаах от 67 % хааччылынна. Кэтэх ыаллар сүнньүнэн оттоон бүттүлэр, онон билигин элбэх сүөһүлээх улахан хаһаайыстыбалар оттуу сылдьаллар. Ааспыт нэдиэлэҕэ тыа хаһаайыстыбатын министиэристибэтин сиртэн үүнээйини ылыыга департаменыттан Дмитрий Махаров кэлэ сылдьан, нэһилиэктэр баһылыктарын, тэрээһиннээх бөдөх хаһаайыстыбалар уонна кэпэрээтииптэр салайааччыларын кытары онлайн сибээһинэн мунньахтаабыта. Ол мунньахха ыытыллыбыт киэҥ кэпсэтии түмүгүнэн, улууска тэриллибит 22 мобильнай биригээдэ саппааска анаан 2740 туоннаны оттуохтааҕа чопчуламмыта. Ити иһиттэн улуус тас өттүгэр атыылыырга анаан 500 т бэлэмнэниэхтээх. Ол оттон атыылаһарга сайаапка Ньурба улууһуттан киирдэ.

Күн бүгүн 13 мобильнай биригээдэ 1334 туоннаны оттоотулар. Мантан күһүн кинилэр үлэлэрин-хамнастарын өссө тэтимирдиэхтэрэ. Окко наадыйар улуустар хаһаайыстыбалара кэлэн оттуулларыгар Бүлүү өрүс уҥуор сытар Тылгыны, Хаҕын, Балаҕаччы уонна Иккис Күүлэт нэһилиэктэрэ сири биэрэргэ бэлэмнэр. Ол эрээри билиҥҥитэ чахчы кэлэллэрин туһунан ким да биллэрэ илик, көннөрү төлөпүөнүнэн билсэ, ыйыталаһа, үөрэтэ, толкуйдуу сылдьаллар.

Бүлүүттэн Андрей Яковлев-Чуос, «Саха сирэ», edersaas.ru сайтка анаан.

+1
0
+1
0
+1
0
+1
0
+1
0
+1
0
+1
0